Shillong, Naiwieng 03
Ka Meghalaya Football Association (MFA) kan shong ïa ka jingïalang ha ka sngi Saitjaiñ na ka bynta ban ïapyrkhat ïa ki kam ki jam kiba ïadei jong kane ka synjuk ban pyntyllun nangne shakhmat.
Kane ka jingïalang ka long ka sien kaba nyngkong eh naduh ba katei ka synjuk ka la ïoh ïa ki nongkitkam kiba thymmai na ka bynta ka samoi treikam kaab saw snem kynthih (2023-27).
Haba pyrshang ban wad jingtip ha kaba ïadei bad kane ka jingïalang la ong ba ka synjuk ka la don ïa ka jingthmu ban pyntyllun ïa ki kam ki jam jong ka synjuk naduh ka Youth Development Cell, Senior bad ka Women Cell ha kaba yn pynkhamti ha ki dkhot ki ban shim ïa ka jingkitkhlieh ïa ka jingïaid jong ka kam.
Kumba ka paw ka synjuk ïalehkai barim jong ka MFA ka la phaikhmat beit tang ïa ki lympung ïalehkai jong ki senior, hynrei ka la ïehbeiñ ïa ki lympug ïalehkai jong ki khynnah (youth league) bad kumjuh ïa ki kynthei (women’s league).
