Kong Sweetymon Rynjah
Ka lehniam ki Syiem Hima Khyrim, ba la ioh kyrteng ruh, kum ‘Ka Pomblang Syiem’ ne ‘Ka Shad Nongkrem,’ ka don la ki khana ba la tynsat ha ki jingleh rukom jong ka ban pashat ha phi ha nga ïa ka shem sngewthuh, ka jingshai irat ki longshuwa jongngi, ha ki jingpyndep rukom jong ka. Ka da pynsah pynneh, tyngkai tyngkhip, kum ka jingshai sngewthuh thymmei ïa nga ïa phi ha la ka tynrai tyllong khasi khara jongngi. Kumta to ngin ïa bishar peit thuh ban ioh ïa ka Jingshai ka Ri, kum ka lad pynsah pynneh tynrai sian stad, ban ïeng ki Hok bad ban sah ban neh ki Riti, ki Dustur ba la saiñ pynwandur wansur ha ka jinglong shi tylli wei dur jong ka Riti synshar Syiem Hima Khasi.
Kawei kaba shoh ïa ka jingiohi da mut jongnga ka long ka jingtyngkai sah pynneh ha ki jingleh niam sieh pyndep rukom, kumba ngi iohi lang. Ai ba kan nang phrang ka Mon, ka Bor bad ka Hukum U Long – Blei, ha ki jingïadei hap biang ïa ka Nylla – paka jong ka saiñ pyrkhat Khasi – Khara, bym kynra – khura ïa ki Hok Longbriew kumba la buh tynsat ki Longshuwa. Ngi dei hi ruh ban ïa plie shabi wad jingshai haba khñium ka ‘lei Synshar ïa ka Dum – ka Maswa.
Kumba, ka Pomblang syiem ne Shad Nongkrem jong ka Hima Khyrim, ka la kyntiew bad kyrsiew ïa ka Nam ka Burom jong kane ka Ri baieit ki Blei, nga la sngew dei hi ruh ban ong, ba ngi la don la ka stad – Tip – Tynrai Khasi nylla bad ngim dei tang ban sah lyngngoh ïa ki jingshai – ka mut – ka pyrkhat bad ka pynshong ban sei ka tylli ka teh song ïa ka shitylli – wei – rong, kyntiew the song, kaba kane ka Niam ki Syiem ka don, to da ïa ngam ïa sei – ïa tei ïa ka Hara – Rong ba la ka jong.
Ka jingiohi – mat peit jongnga, ka kyntu kyrsoi pynkiew ïa ka mut ka pyrkhat jongnga, ban ïa pashat lem shaphi baroh kum – ka jingkyntu kynpham, ha ki Rang – ki Thei ba la ioh jingstad pynnang, kin da kiew jingsngew, kin da pyrkhat – Aiu ngin synñiang ha ka thoh ka pruid bad ka bishat ïit bniah ïa ki khara Rong Nylla na la ka jong, ban lait na ki Niam – ra bad ñiur – ñiur jong u Shatei – Shathie, u Mihngi – Sepngi.
Nga la sngew dei hi ruh ban ong lyngba ki jingpyndep ïa ki Rukom, ki kyntien duwai pynsngap – pynsngew, ki soh – blei ba la san na la ka thoh long kpoh – long kur, ki pashat keiñ ïa kata ka jingsngew khara jong ka Hok bad ka Jingshisha, kaba la don bad ka Jaidbynriew, ym tang, ha ka saiñ dustur pynsah synshar Syiem Hima Khasi, hynrei ka long ruh ka thliew plie shabi sha ka stad da tip bad ka Bor iohi jngai ki Kong ki ñi, ha khep shah shon Maweh jong la ki ‘lei synshar sngewthuh khasi.
Ka Jingpyndep rukom ki don ruh ha ki ïa ki kthong burieh jingshai ai jingtip shem sngewthuh ban ioh lait na kiew kyrtep lade ha la ka jinglong briew. Ki symboh ktien bad kyntien ki buhrieh ruh ha ki, ïa ki jingsngew, jingmut bad pyrkhat, sha ki thwei ka Myndanglong. Ki shem jingeh jong kane ka juk ba la shai mynta, ka jngi ha ki jingthaba pynphalang ïa ngi, ba lade ngim husiar bad sumar syndong jingleh – jingkam, kan sa kiew ka Dam na ka Duh sha ka Julor. Kan ïai kyrsiew hi ruh ïa ka kyrdan – ka Bor ‘Suitñia Longkñi jongnga jongphi.
Kumta to ngin ïa ngam jingsngew ban ïa ri ïa dup ïa ka Lynti – ka Hok bad ka jingpynkiew ïa ka Bashisha, khnang ba baroh kaba ngi leh ngi kam lyngba ka stad – pynnang ban nang pynriewspah la ka ktien bad ban bishar ïa ki ktien khasi ha ki jaka bapher – bapher jong la ka Ri, ba dang sah shrah haduh mynta, ban da syn-niang la ka ‘Khara – Rong’ long beit – long shida ban ioh lait na ka Bira.
Ka Pomblang Syiem Hima Khyrim Ba suk shaphi baroh. Khublei ! Ka leh rukom, kyrsan jong ka kpoh long kur ha ka long jait Syiem Shyllong, ba ngin nang ïa khiar, ïa thir ïa ki syrdeng jingshai, ki ban pynkiew bad kyntiew ïa la ka Longbriew Manbriew, Pynïadei – hap biang ïa kaba Bha na kaba Sniew. Ka Bai – seng – ka Bai – siew ha la ka Jait Bynriew Khasi Baïar.
Khu – Hok ! Khu – Blei – Kuriei – Ko Blei.
