Aizawl, Naiwieng:
Ka sorkar Manipur ha ka sngi Balang ka la weng noh ïa ka jingpynjynsur hadien ba la pynjari ïa ka Curfew naduh ka 5 baje mynstep haduh ka por 10 mynmiet ha Imphal East bad West distrik namar ka jingsdang biang ki kynrum-kynram kiba la mih ha ka jylla.
Ka kynhun jong ki riewpaidbah ha kane ka sngi ki la sdang biang ban wanrah ki jingkulmar habar jong ka 1st Battalion of Manipur Rifles ha ka nongbah jong ka jylla ha Imphal, ha kaba kane ka la pynlong ïa ki pulit ha katei ka jaka ba kin siat pynma sha suiñ da bun sien, la ïathuh ki heh pulit.
Kumba la ïathuh ka tyllong khubor, la ong ba ka kynhun jong ki paidbah ka la leit ban lute ïa ki tiar siat hynrei na ka liang ka kaiphot kam pat lah ban pynshisha halor kane ka jingjia.
Ki la mih biang ki jingïakynad hadien ba u heh pulit u la shah siat ha ki lehnoh Kuki ha Moreh ka jaka sor kaba don ha khappud India-Myanmar ha ka sngi Ba-ar.
Ki la don kumba katto katne tylli ki kynhun seng jong ki riewlum kiba la khot pynlong da ka pakhang shnong kaba 48 kynta ha baroh ki distrik ba shong shnong ki Kuki bad Zo jong ka jylla naduh ka por shiteng miet jong ka sngi Balang ha kaba kane ka la pynlong ïa ki heh pulit ba kin phah ban pynjur ïa ka jingpahara bad pyntreikam ruh da ki Commando jong ki pulit ka Manipur sha Moreh.
Ka kynhun seng ne ka Forum jong ka Indigenous Tribal Leaders ka la pynshisha da kaba ong ba ki la don kumba 12 ngut ki nongshong shnong kiba shida, kynthup ïa uwei u briew uba don jingduna dkhot met, kiba la shahkem na ki ïingsah jong ki ha ka por ba la don ka jingleit khynra jong ki pulit, ha ka sngi Balang.
