Victoria, Naiwieng:
Kawei ka nong Australia kaba don jingiadei bad ka jaka die tit ‘Mushroom’ ha ki thaiñ jong ka Victoria, ka la shah bat noh halor ka jingshah suba don kti ha ka jingïap jong ki 3 ngut ha ki khyndiat por ba la leit. Ia kane ka briew la ithuh kum ka Erin Patterson, kaba lad on 49 snem ka rta, la kem noh ia ka na ka iingsah jongka hapoh Leongatha, kaba don ha ka thaiñ Gippsland, ha ka por kumba 8 baje jong ka step Sngi Palei.
La ong ba kane ka jingshah kem jong katei ka briew ka la pyn kyndit ia katei ka shnong Leongatha kaba rit bha bad kaba don kumba 10 kilometer lane kumba 70 mile na Southwest jong ka Melbourne.
Kumta, la ong ba ka kynhun wad bniah jong ki pulit, ka la leit ban kem noh ia katei ka briew ha katei ka step hadien ba ki la wad bniah ia ka daw jong ka jingkhlad jong kitei ki 3 ngut ki briew hapoh Leongatha ha ki khyndiat por ba la leit jong une hi u snem.
Namar la ong ba ka Patterson ka la aibam ia kitei kiba iap baroh da ki jingbam bad ki tit kiba ka la shet hi hapoh iing. Katkum ba la ioh jingtip bniah, kane ka la jia ha ka 29 tarik jong u Naitung bad la ong ba kitei kiba ia leit bam ha iing jongka ha katei ka por ki kynthup ia ka kiaw bad u kthaw jongka, ha ryngkat bad u Pastor bad ka kurim jong utei u Pastor, kiba la leit jngoh sha iing jongka ha katei ka sngi.
Hynrei ha katei hi ka miet, la ong ba kitei ki 2 ngut ki shi kurim naduh ka kiaw- kthaw, bad utei u Pastor bad ka kurim, ki la poi hospital noh namar ki jingshitom kiba la ktah ia ka met jongki hadien ba ki la bam ia utei u tit ba la shet da ka Patterson. Bad tang hapoh shi taiew, baroh 3 ngut na ki, ki la khlad noh syndon. Napdeng jong kitei ki 4 ngut, dei tang utei u Pastor uba la lait im bad kata ruh, ka long hadien ba u la thiah pang hapoh ka jaka sumar haduh 2 bnai tam.
Utei u Pastor u la sdang ban shait bad mih pyrthei biang dang shen ha une u Risaw, ha ka jingleh burom bad jingkynmaw burom ia ka kurim jong u kaba la khlad noh ha katei ka jingjia kaba sngewsih.
Katba, na ka liang jong ka Patterson, ka la pynpaw bad phla ba kam shym don jingmut sniew eiei haba ka ai bam ia kitei ki nongleit jngoh sha ka iing jongka. Ka la pynpaw ruh ba ka long khuid bad long shida namar kam shym don jingbuh shun ne daw sniew eiei bad kitei ki 4 ngut ha ka jingim jongka baroh shi katta. Hynrei ka la iathuh ba ia utei u tit ba ka la shet bad ai bam ia kitei ki 4 ngut, ka la leit thied na kawei ka dukan die tit jong ka ‘Asia’ bad kam shym poi pyrkhat ba kitei ki tit kin long kiba sniew bad ki bym bit ban bam.
Kumta, ka Patterson ka la pynshisha ruh ba kam don jingthmu sniew eiei ia kitei ki 4 ngut ki briew, kiba ka ju ieid bad sngewtynnad bha.
