New York, Naiwieng:
Uwei u rangbah 43 snem na United States, u la shah kem noh hadien ba la iohi ba u pynap suloi ia uwei u khynnah 6 snem tang namar jong ki mit-mit Halloween. Kane ka la jia ha ka Sngi Saitjaiñ mynshem taïew hapoh ka nongbah New York jong ka United States.
Ia utei u briew la ithuh kum u Michael Yifan bad la kem noh ia u namar ka jingleh jong u ka buh jingma ia ki khyllung-khynnah bad ia kiba don hajan jong u.
Ha kane ka jingjia, la ong ba kawei ka longkmie ha ryngkat ka khun kynthei, 2 ngut ki khun shynrang bad uwei u khun jong u para jong ka, ki la leit ban sam mit-mit sha ki iing jong ki paralok kumba ju leh ha ka jing-rakhe ia ka ‘Halloween’, hynrei la ong ba hadien ba katei ka khun kynthei ka la dep ban leit buh ia ka song mit-mit bad ki jingbam thiang ha ka jingkhang jong kawei ka iing, katei ka khynnah ka la iathuh ba ki la kum leit buh bakla ha ka iing ka bym dei. Dei ha katei ka por ba utei u khun ba 6 snem u la leit ban shim biang noh ia katei ka pla ba la thep ia shibun ki mit-mit bad ki jingbam nabar ka jingkhang jong katei ka iing bad dei ha kane ka por ba utei u briew uba la don 43 snem ka rta, u la plie kynsan ia ka jingkhang bad thew da ka suloi na ka shyllang mat jong utei u khynnah 6 snem.
Katei ka longkmie ka la pyntip sha ki pulit halor katei ka jingshem jong ki bad ki pulit ruh khlem da pynslem ki la leit ban kem noh ia utei u briew namar ka wanrah jingma ia ki marjan-marpa.
Katba na ka liang u nongïasaid aiñ jong utei u rangbah, u la ong ba kine baroh ki long tang ki jing kynnoh bad ki long kiba bakla namar utei u briew um shym leh kumta kumba la leit ujor da katei ka briew.
Kumta, ki pulit ki la bat noh shwa ia utei u rangbah tad haduh ban da ioh ban pyndep ia ka jingtohkit kaba bniah bad ba pura bad ban lap ruh ia ka jingshisha halor katei ka jingjia.
