Washington, Naiwieng:
Ka kynhun wad bniah jong ka United States, ha ka Sngi Thohdieng ka la ioh jingtip ba ka kynhun shipai ‘Wagner’ jong ka Russia, ha kane ka kynti ka la rai ban ai jingkyrshan sha ki lehnoh Hezbollah jong ka Lebanon wat hadien ba la iohi ba kitei ki lehnoh na Lebanon ki la sdang ban iakynad bad ka Israel bad ki la pynpaw ruh ia ka jingkyrshan jongki bad ka jingiatrei lang bad ki lehnoh Hamas ha ka jingiakhun thma jong ka Hamas pyrshah ia ka Israel ha kane ka por.
Kumta, la ong ba ki heh ka United States ki la pynpaw ia ka jingsngew khia halor ka jing ïadon bynta jong katei ka kynhun shipai na Russia bad ki lehnoh jong ka Lebanon, khamtam haba la iohi ia ka jingshyrkhei bad ka jingma kaba ap na ka thma jong ka Israel lada kiwei pat ki ri kin leit ban ïadon bynta ha ka thma jong ka Israel pyrshah ia ki lehnoh Hamas kiba synshar ia ka Gaza.
La ong ba kitei ki tiar SA-22 System kiba la ju tip ruh kum ki Pantsir-S1, ki long ki kynja trok kiba lah ban kit bad pynher ia ki ‘namding kiba khlaiñ bad kiba la shna bad pynmih da ka Russia.
Ia kitei ki tiar la pyndonkam ruh da ka Russia ha ka jingiakhun thma pyrshah ia ka Ukraine bad la phah ruh sha Middle East da ki lehnoh jong ka Iran naka bynta ki jingiada ban iakhun pyrshah ia ka Israel lada jia ba wan poi kum kata ka por.
