Shillong, Naiwieng 03
Wat la ka madan ïalehkai phutbol ha Third Ground, Polo ka la long kaba la rim naduh ba la siang nyng-kong eh ïa ka da u phlang plastik ha u snem 2011, hynrei mynta ka kynti ka Meghalaya Football Association (MFA) kan pyrshang ban wad ki lad jingïarap na ka Sorkar Jylla na ka bynta ban siang pat da uba thymmai.
Kumba ka long mynta katei ka madan kaba la long trai da ka MFA ka la don 12 snem kynthih naduh ba la siang da u phlang plastik ha u snem 2011. Ka la long kaba rim bha ha kaba wat ki nongïalehkai ki la shem jingeh ban ïalehkai namar ka la long kaba eh palat bad na ka liang ki bor pynïaid ki la hap ban shu syrdep ïa ka na ki bynta kiba la jot la pei.
Ym tang katta ha ka por ba slap jur, la hap ban pynsangeh ïa ki jingïaleh -kai phutbol na ka daw ba katei ka madan ka la dap um bad wat ki thliew ki ban tuid ka um ki la set lut.
U President ba thymmai kane ka synjuk u Bah Hamletson Dohling u la pynpaw dangshen ba na ka liang ki dkhot ka Synjuk kin sa ïashong lang ban ïapyrkhat ïa kane ka bynta.
U Bah Hamlet u la kubur ba katei madan ïalehkai ha Third Ground ka la long kaba rim bha bad ka la buh jingeh bha ïa ki nongïalehkai namar ka jingeh jong ka madan.
Dangshen u Myntri Rangbah ka Jylla u Sonrad K. Sangma ha ka jingbuh ïa u maw nongrim ban tei ïa ka Rongjeng Stadium, u la pynbna paidbah ba na ka liang ka Sorkar kan pynlut haduh T. 1000 klur na ka bynta ki jingtei ïa ki jaka ïalehkai ha kylleng ka Jylla ha kine ki san snem ki ban wan.
“Te kumta ngin shim ïa kane ka kabu ksiar ban pan jingïarap na ka Sorkar khnang ban ïoh ban kylliang noh da uwei pat u phlang plastik uba thymmai ha katei ka madan,” la ong u Bah Dohling.
Kum ban shu pynkynmaw katei ka jingsiang phlang plastik ha Third Ground, Polo ka la long kaba nyngkong eh hapoh ka Jylla lyngba ka jingïarap jong ka FIFA na ka projek ‘Win in India With India’ ha ka jinglut kaba T. 6 klur.
Naduh ba la dep siang ïa katei ka madan, la ju pyndonkam bun kynta ban kilanmet da ki klob kiba ïashim bynta ha ka Shillong League, I-League nalor kiwei pat ki lympung ïalehkai ha kane ka nongbah.
