Shillong, Naiwieng 05
Ka kynhun ki rangïalehkai phutbol ka Jylla ka la ïasam mar shi dor-thong ha ka jingïakhun pyrshah ïa ka Kerala ha ka 37th National Games hadien ba ïakhaid mar 2-2 kol ha ka jingïalehkai jong ka Group-B kaba la long ha Goa.
Ha kane ka jingïakhun kaba la long ha ka Sngi Saitjaiñ, ka Meghalaya ka la tam da 2-1 kol, hynrei hashwa ban wai ka la shah pynphai kylla ha ka Kerala.
Ha kane ka jingïakhun, u Donlad Diengdoh u la ïoh ban thep ïa ka kol kaba nyngkong eh ha ka minit kaba 43 hadien ba u Kitboklang Pale u la shah khanglad noh ha ki rangïalehkai ‘dien ka Kerala. Kane ka long ka kol kaba lai na ka bynta u Donlad kaba u la ïoh ban thep ha kane ka lympung.
Haduh kaba kut jong ka kylla step, ka Meghalaya ka dang tam da 1-0 kol. Hadien ba la bteng ïa ka jingïakhun jong ka kylla miet kine ki kynhun kim shym la lah ban thep kol.
Ha ka minit kaba 84 ka Meghalaya ka la ïoh da ka free-kick, hynrei u rangapkol ka liang pyrshah u la lah ban pyllait na ka jingshah thep, hynrei hadien u Maxderidoff Wahlang u la ïoh ban thep kol.
Hashwa ban wai ka Kerala ka la ïakhun tyngeh bad ka la lah ban pynphai lyngba u Yash Shukla (90’+1). Hadien ar minit ka Kerala ka la lah ban pynïakhaid kylla na ka daw ka jingbakla thep hi uwei na ki rangïalehkai ka Meghalaya ha ka free-kick ba la ïoh da ka Kerala.
Lyngba kane ka jingïakhaid ka Meghalaya ka la pynkut noh ha kane ka jingïaid lynti da kaba ka la kamai 1 point na ki lai sien ïakhun jong ka Group-B bad ka jingïai ap khmih lynti ba kane ka kynhun kaba la wan ba-ar ha ka Santosh Trophy ba kan khur takma, kam shym la urlong.
