
Shillong, Naiwieng 05
Ka jingïalehkai bha u Virat Kohli bad u Ravindra Jadeja ka la pynlong ïa ka India ban pynliem noh ïa ka South Africa da 243 run na ka bynta ban ïai bat ïa ka kyrdan ba ha khlieh duh ha ka World Cup.
Ha kane ka jingïakhun kaba la long ha ka Sngi U Blei ha Eden Gardens kaba ha Kolkata, u Kohli u la lah ban pynïaryngkat bad ka rekod ha ka pyrthei na ka jinglah ban kamai ïa ka spah run (101 not out) ha ka sngi rakhe ïa ka sngi kha kaba 35 snem bad ban pynlong ïa ka India ban buh ïa ka thong da kaba kamai 326 run bad shah pynkhyllem 5 wiket ha Kolkata hadien ba ka la shimti ban tied nyngkong.
Utei u kapten barim jong ka ri (Kohli) u la lah ban kynjoh sha ki 49 tylli ki jinglah ban kamai ïa ki spah run ha ka one-day international na ka bynta ban ïaryngkat bad u khlur ïalehkai barim u Sachin Tendulkar.
U kapten ka kynhun u Rohit Sharma ruh u la lah ban ïalehkai bha da kaba tied 40-run na ki 24 bol, na ka bynta ban noh synñiang ïa ka kynhun lem bad u Shreyas Lyer uba la ïoh 77 run na ki 87 bol (7x4s & 2x6s).
Haba la wan shimti ïa ka pali ban kawang bol, u Ravindra Jadejau la wanphai da kaba ïoh khur 5 wiket na ka bynta ban khanglad ïa ka South Africa ban kamai tang 83 run ha ki 27.1 over.
Te kumta ka India kaba la lah lypa ban pynthikna ban rung sha ka semi final, kan pynkhreh ïa ka jingïalehkai kaba khatduh jong kane ka lympung pyrshah ïa ka Netherlands ka ban long ha ka 12 tarik mynta u bnai.