Beirut, Naiwieng:
U heh nongialam ka kynhun lehnoh Hezbollah jong ka Lebanon, u Hassan Nasrallah, ha ka Sngi Thohdieng u la maham jur bad ong ba ka thma hapdeng ka Israel bad ki lehnoh Hamas ka lah ban kylla sha ka thma jong ka thaiñ Middle East baroh kawei lada ka Israel kam sangeh noh ia ka jing-leit hiar thma sha Gaza. Ha kajuh ka por, utei u nongialam u la kynnoh ia ka United States ba dei ma ka kaba pynshlur bad ai mynsiem ia ka Israel ba kan leit thombor ia ka Gaza khlem sangeh haduh ban da poi haduh une u pud ba ka Gaza ka la jot bad um lut.
Ha kane ka sien ai jingkren ba nyngkong eh jong utei u nongialam ka Hezbollah naduh ba sdang ka thma jong ka Israel, u Nasrallah u la ong ba kane ka thma jong ka Israel bad Gaza ka lah ban pur nyngkong eh ha Lebanon lada ym lah ban pynsangeh noh ia ka ha kane ka por.
Kumta la ong ba utei u nongialam u la pharep beit-beit ia ka United States bad ong ba ka jingjia jong ka thma bad ka jingshah thombor ki paid nongshong shnong ka Gaza ha ka Israel ha kane ka por, ka dei namar jong ka America. Namar kane, u la ong ba ka Hezbollah kan nym ailad ia ka United States ba kan nang iaid shakhmat bad pyn-urlong lut ia baroh ki jingthmu jongka watla ka Gaza ka la khyllem lypa ha ka jingleit hiar thma ba khlem sangeh jong ka Israel.
