Nongstoiñ, Naiwieng 05
Ka kynhun ïalehkai jong ka Nongstoiñ Football Association, ka Veteran ‘A’ F.C ka la khur ïa ka jingjop ha kaba sdang ïa ka lympung ïalehkai phutbol ba la tip kum ka Above 40 years Knockout Football Tournament 2023.
Ïa kane ka lympung la plie pyrda ha ka sngi Saitjain ha madan Mawkadiang, West Khasi Hills bad la pynïaid da ka Mawkadiang Sports Social Welfare and Cultural Organisation.
Katei ka nam jop jong ka NFA Veteran ka la wan hadien ba ka la pynliem noh da 5-0 kol ïa ka Lawse SC.
Ha katei ka sngi u Deputy Commissioner ka West Khasi Hills u Bah Garod LSN Dykes (IAS) u la long kum u kongsan, bad u Bah F. Lyngkhoi kum u symbud kongsan ha ryngkat ka jingïadonlang ruh u Bah H. Thongni, dkhot EC ka shnong Mawkadiang, u Bah E.Lyngdoh, President bad u Bah R.Syiemlieh, Secretary ka Mawkadiang Sports Social Welfare and Cultural Organisation.
Lah ban kdew hangne ba ha katei ka lympung ki don kumba 12 tylli ki kynhun na kylleng ka Jylla kiba wan ban ïashim bynta. Ka khusnam ka long da ka song pisa bad haba kheiñ lang ka long T.50 hajar.
Na ka liang ka MSSC&CO ka la pyntip ruh ïa ki jingïalehkai yn bteng biang ha ka 11 tarik mynta u bnai ha ka por 12 baje nohphai sngi hapdeng ka Western Veteran ‘B’ na West Khasi pyrshah ïa ka Soy FC na Ri Bhoi, katba ha ka por 2 baje janmiet kan hapdeng ka Byrki Area pyrshah ïa ka Mawïawban United.
