Ki kam sniew kam smeh kiba bun rukom ki ju jia na ka por sha ka por. Ki don kiba kine ki jait kam ki paw pyrthei, bad ki don ruh ki bym paw. Haba paw hakhmat, ka kham suk ban ïakhun. Kaba jynjar ka dei haba leh haba rieh, haba dum. Kiba kum kine ki jait kam sniew ki kham long kiba wanrah jingïohnong. Hangne ngin hap ban ïa phai biang sha kita ki “High-Level” kiba katkum ka jingïohsngew, ki la klun lut nadong shadong. Ha ka jylli jong kita ki “High-Level” la ïohsngew ba ki don ki heh saiñpyrthei, babu sorkar la ki dei kiba don ha Secretariat lane ha ki distrik bad ki Block, pulit, bad khamtam eh kito kiba kwah ban kamai spah da kaba pynkheiñ lut ïa ki kyndon baroh bad ki bym don jingsalia, jinglehraiñ bad ka jingïatiplem.
Ngi lyngngoh ba ka kyrteng “High-Level” ka paw tat ynda la wan ka sorkar ba la ïalam da ka National People’s Party (NPP) naduh u snem 2018 ter-ter. Hashwa kata, ngi ïohsngew ïa ka jingdonkti ki heh ki haiñ ban kamai spah ïalade da kaba ïatreilang bad ki ‘Malik’ bapher-bapher, hynrei ka khlem pat da sawa jam kumba ka long naduh u snem 2018 ter-ter. Mynta la ïohsngew ïa kita ki “High-Level” kiba donkti naduh ka jingtih bad jingkhaïi tuh ïa u dewïong, jingkhaïi masi be-aiñ sha Bangladesh, jingkhrong pisa na ki trok kit mar, bad ka jingbuh ïa ki khyrdop lum pisa ha surokbah. Kiba ïohnong na kine ki jait kam be-aiñ ki long tang katto katne ngut katba kiba saja pat ki don da ki lak ngut bad kita ki dei ki nongshong shnong jong kane ka jylla.
Ngi sngewthuh ba kam don jingmyntoi lada leit ujor sha ki pulit wat ynda la lap ïa ki jingshisha. Kumba ka Meghalaya High Court ka la dep pyni dak khyndiat bnai mynshwa ba kam don jingshaniah ha ka tnat pulit jong ka jylla, ma ngi kum ki paidbah ruh ki sngewïahap bad kata. Teng-teng ka pyntieng pynban wat tang ban pyrkhat ban leit ujor sha ki pulit haba lap ïa ki kam be-aiñ namar ka jingshaniah ha kane ka tnat ka la hiar haduh katta-katta. Ngi dang kham sngewshaniah pynban ha ki bor tohkit kiba nabar kum ka Central Bureau of Investigation (CBI), Enforcement Directorate (ED), Directorate of Revenue Intelligence (DRI), bad kumta ter-ter. Hynrei kine ki tnat tohkit ki la shah kynnoh na ka por sha ka por ba ki takraiñ tang ïa kito ki ’riew saiñpyrthei kiba dei na ki seng ki bym jingïadei eiei bad ka BJP lane kiba pyrshah ïa ka BJP. Sa ïano pat ngin ïa shaniah haba ka long kumta? Ka long shisha kaba eh namar ha man ki kam paidbah, ka kam saiñpyrthei ka la rung lut bad ka la ktah lut. Ki bym kyrshan ïa ki seng kiba shong ha ka liang pyrshah lane ki ’riew pdeng, kim don jaka satia hangno-hangno ruh.
Ka kam saiñpyrthei kam dei satia ban ïoh rung ha ki kam tohkit khamtam ha ka liang ka bamsap bamngem. Lada shaniah tang ïa kito ki bym don ha ka bor lane kiba ïakhun pyrshah ïa ka seng kaba ïalam ïa ka sorkar, kam don jingmut watla ka dei ka rukom ban pynshitom ïa baroh kiba donkti ban tuh ban thiem ïa ka pisa paidbah. Yn leh kumno pat ïa kito kiba ïadon bynta bad ka sorkar bad kiba leh ïa ki kam be-aiñ kiba laiphew jait laiphew skit haduh ba la ishyrkhei sa ban tip bad ïohi? Ngi tharai ba katba kato ka seng ka dang don beit ha ka bor, yn ym don ba lah ban leh eiei bad hap ban shu shong bad sngap. Shaei shuh kata ka hok ka sot? Shaei shuh kata ka jingpynshitom ïa kiba leh ïa ki kam be-aiñ katkum ka aiñ? Haba shah kem ki rit ki ria, ka sorkar ka kren khaiñ ba kata ka aiñ kan ïaid kumba ka dei ban ïaid. Hynrei ngim ïohi ba kata ka aiñ kan treikam pyrshah ïa ki “High-Level”. Dei kiba kum kine ki jingleh ba ka synshar paidbah ka don beit hapdeng ka jingma na ka por sha ka por bad ka shong synjor.
Ngim tip shuh kaei ka ban jia ïa kane ka jylla jong ngi na ka daw ba la jyllei palat ka pyrkhat bad ka jingmyntoi shimet. Kiba bun na kito kiba don ha ka shuki jong ka bor, kim don mon satia ban pynkhuid ïa ka jaboh jabaiñ kaba la satah ïa ka saiñpyrthei bad kaba la ïohlad ban phrung ha man ki shlem treikam. Shong ruh jhieh, ïeng ruh tyngkhuh – shaei ngin ïa phai? Ka long shisha kaba pynduh jingkyrmen haba phai sha kadiang sha kamon. Sa tang ka por ka ban batai ïa kiei-kiei baroh.
