Shillong, Naiwieng 05
U MDC barim ka Umsning konstitwensi, Bah Donkupar Sumer, u la ong ba ki paidbah ki dang kynmaw ïa u haduh mynta haba u la shakri kum u MDC ha ki snem ba la leit noh.
U Bah Donkupar u la ong ba kum u nongtrei ka seng NPP un pan tiket beit na ka seng lada ka lad ka plie ïa u na ka bynta ban ïakhun ïa ka ilekshon MDC na Umsning konstitwensi, Ri Bhoi District ka ban long la shem snem.
“Nga dang don ka mynsiem ban trei ïa ki paidbah ka Umsning konstitwensi bad ngan dang bteng ban shakri ïa ki paidbah wat la nga khlem long eiei shuh” u la ong.
Ha kine ki sngi ka la mih ruh ka khubor ba ka MDC ba mynta ka Kong Macdalyne Mawlong kaba dei ka kyrtong NPP kaba la shah rem ha ka ilekshon MLA na Nongpoh konstitwensi ka la pynkhreh ban ïakhun beit na Umsning ha ka ilekshon MDC.
Halor kane ka bynta u Bah Donkupar um kwah ban ong eiei, hynrei u la ong ba un pan tiket beit na ka seng NPP namar u la dei lypa u dkhot ka seng.
“Lada jia ba ngam ïoh tiket ngan pyrkhat da kawei pat namar ka mynsiem jong nga ka dang rhem ban shakri ïa ki paidbah” u la ong.
Kum ban shu pynkynmaw, u Bah Donkupar Sumer u la rung sha ka seng NPP ha ka 6 tarik Kyllalyngkot, 2023 ha shwa ban wan ka ilekshon MLA hadien ba u la shah pynduh tiket na ka UDP.
U Bah Donkupar Sumer u la long kum MDC naduh 2014 haduh 2019 na ka seng UDP.
