Rome, Naiwieng:
U Myntri ka tnat kam bar ri jong ka India u S. Jaishankar u la leit ban kynduh ia u President ka Italy u Sergio Mattarella bad kiwei pat ki heh nong-ialam jong katei ka ri ban iakren halor ki lad ki lynti ban pynkhlaiñ ia ka jingiadei hapdeng ka India bad ka Italy ha kine ki sngi ban wan.
Ki katto katne ki mat ba kongsan ba u Jaishankar u la ioh ban iakren bad utei u nong-ialam ka ri Italy ha katei ka sngi ka long ban tehlakam ia ki kam thombor jong ki lehnoh bad ruh ban pynkhlaiñ ia ka jingiadei ha ka liang ka jingai jingiada markylliang lada jia kino-kino ki jingthombor kiba wan hadien-habud.
Ha ka jingiakren jong ki hapoh katei ka jing-ialang, u President ka Italy u la pynpaw ia ka jingkyrshan ba radbah jong ka Italy ia ka India ha ki liang baroh.
Kumjuh na ka liang utei u Myntri ka tnat kam bar ri jong ka India, u la pynpaw ia ka jingsngew nguh bad jingsngew shaniah jong ka India halor ka jingkyrshan jong ka Italy ia ka India, bad u la pynpaw ruh ia ka jing thrang jong ka India ban nang pynskhem bad pynkhlaiñ ia ka jingiadei bad ka Italy khnang ban lah ban pynbit-pynbiang markylliang ia ki jingdonkam ha ki liang bapher bapher.
U Jaishankar, ha katei ka sngi u la ioh ruh ban iakynduh bad u Myntri ka tnat iada jong ka Italy- u Guido Crosetto, ha kaba ki la ioh ban iakren halor katto katne ki mat ban pynkhlaiñ ia ka jing-iadei hapdeng baroh arliang ri bad ban ioh ruh ban iatrei lang ha ki kam bapher ba kine ki ri kin nang iaid nangne shakhmat.
