Beijing, Naiwieng:
Ki bor pyniaid ka China ha ki khyndiat sngi ba la leit, ki la pynbna ia ka jingmaham halor ka jingjur palat ka jingjaboh ka lyer khamtam ha ki nongbah kiba sha ka phang Shatei jong ka China. Kumta ruh la ong ba ka jingjaboh jong ka lyer ha kitei ki bynta, ka la pynlong ia ki paidbah ba kin shem jingeh haba leit-wan da ki kali khamtam ha ka por mynmiet namar ka pyrthei- ka mariang ka la lyng-uh da ki tdem jaboh bad kam long shuh kaba shngaiñ wat ia ki paidbah kiba iaid da ka kjat ne kiba shong ha kitei ki bynta ruh namar ka jinglong jong ka lyer ka la ktah jur ia ka koit- ka khiah jongki.
Kumta, la ong ba ki bor pyniaid ka China ki la hap ban thaw lad kumno ban pynduna bad ban tehlakam ia ka jingjaboh palat jong ka lyer, da kaba pyntreikam noh shwa tang katto- katne ki Kad Liengsuiñ, lane ban khang noh shwa ruh ia ki surok bah bad ki surok kiba kham heh iew namar ka jingdon ki karkhana bad ka jingbun ki kali ka la pynlong ia ka lyer ba kan jaboh haduh ba ym lah shuh ban iohi na kawei ka jaka sha kawei pat tang shu la kham jngai.
Ka China ka la pynbna ruh ba kan sa wanrah noh da ki rukom pyniaid kali ba thymmai khamtam ha kito ki nongbah ba ka jinglong- jingman jong ka lyer ka la kham sniew.
Namar la ong ba ka jing jaboh ka lyer ha ki bynta North jong ka China ka la jur bha khamtam ha ka aïom Lyiur ba ka jingshit ka suiñ bneng ka kot ia ka 30 Degree Celsius lane 86 Degree Fahrenheit ha ki katto katne ki bynta jong ka ri.
La ong ba ka jinglong jingman jong ka lyer ha ki thaiñ Tianjin, ka Hebei, ha Beijing bad ha ki thaiñ North jong ka Henan, ka la nang jaboh shuh shuh bad ki heh ka China ki la suba ba katei ka jing sniew jong ka jinglong- jingman ka lyer hapoh China ha kine ki sngi ka long namar ka jing pyntreikam ia ki karkhana bapher, kumjuh ruh ka jing pyniaid trok palat bad ha kajuh ruh ka por ka jing thang ia ki pynthor bad ki lyngkha rep.
