Shillong, Naiwieng 05
Ka Kharang SC ka la rah ïa ka nam lahduh ha ka lympung ïalehkai 4th Division Football League 2023 ba la pynïaid da ka Shillong Sports Associa-tion. Kane ka wan urlong hadien ba lah pynliem noh ïa ka Iatyllilang SC lyngba ka tie-breaker da 5-4 kol ha ka sngi Saitjaiñ.
Kine ar tylli ki kynhun ki la kiew sha ka Third Division bad kin ïoh ïashim bynta naduh ka aïom ka ban wan.
Ka jingïakhun final kaba la long ha 1st Ground (SSA Stadium) ka la long kaba itynnad bad kaba ïakhaid bha ha kaba baroh ar kynhun ki la pyrshang ban ïakhun tyngeh naduh kaba sdang, hynrei kim shym la ïoh ban pynkhih jar ha ka kylla step.
Dei ha ka kylla miet ba ka Kharang ka la ïoh ban thep kol nyngkong eh lyngba u Laban Taro ha ka mint kaba 55. Hynrei hadien saw minit ka Ïatyllilang ka la lah ban pynphai kylla lyngba u Bashaiphang Nongspung.
Kane ka jingïakhaid ka la pynlong ïa kine ki kynhun ban ïai bteng ha ka ban ïakhun tyngeh shuh shuh, hynrei haduh kaba kut jong ka jingïalehkai kim shym la lah shuh ban thep.
Te kumta na ka liang ki bor pynïaid ki la rai ban pynïashut noh da ka tie-breaker ha kaba ka Kharang ka la lah ban thep da 5-4 kol ïa ka Ïatyllilang na ka bynta ban khur syndon ïa ka jingjop.
Na ka Kharang kiba la lah ban thep kol ha ka jingïashut tie-breaker ki long u F.Tariang, B.Khong-joh, J.kharsati, L.Taro bad u K.Marweiñ, katba na ka Ïatyllilang la thep sa u S.Khar -umnuid, M.Kharmuti, N.Mawkhiew bad u I.Mynsong.
Ïa ki khusnam ha kane ka sngi la sam da u President ka Meghalaya Football Association u Bah Hamletson Dohling ha kaba la ïadon lang ki dkhot ka SSA bad kiwei.
