Jowai, Naiwieng 05
Ka Demthring, Nangbah Ïawmusiang, Wahïajer bad ka Dulong ki la jam sha ka semi final ha ka lympung ïalehkai First Division Football Tournament ba la pynïaid da ka West Jaiñtia District Sports Association (WJDSA).
Katba ka Shangpung Moosyiem bad Lutituber Ïalong ki la shah pynhiar kyrdan sha ka Second Division hadien ba kim lah ban ïalehkai bha ha kane ka aïom ïalehkai jong ka First Division.
Haba phai sha ka miej ïakheiñ dor-thong (point), ka Demthring, Nangbah Ïawmusiang, Wahïajer bad ka Dulong ki la don ha ki kyrdan ba hakhlieh duh jong ka miej Ïakheiñ dor-thong jong kane ka aïom ïalehkai.
Ka Demthring bad ka Nangbah Ïawmusiang na ka Group-A, ki la kamai mar 10 dor-thong ha ka jingïakhun kaba mar 5 sien. Katba ha ka Group-B, ka Wahïajer ka la kamai 15 dor-thong bad ka Dulong ka kamai 12 dor-thong ha ka jingïakhun kaba mar 5 sien.
Ha ka Group-A, ka Mukhla Evergreen bad ka Sabahmuswang ki la kamai mar 9 dor-thong, katba ha ka Group-B ka Moosalyngkat bad ka Sohmynting ki la kamai mar 7 dor-thong.
Kiwei pat ki kynhun kiba don sha trai duh jong ka miej ïakheiñ dor-thong ki long ka Mookyndur kaba la lah ban kamai tang 4 dor-thong, ka Khliehïong-riang (3 dor-thong), ka Shangpung Moosyiem (1 dor-thong), katba ka Lutituber Ïalong ka khlem lah satia ban kamai.
Haba phai sha ka jingiakhun kaba khatduh jong kane ka aïom ïalehkai kaba la long ha madan Kiang Nangbah Stadium Ladthadlaboh, Jowai ha ka sngi Saitjain, ka Wahïajer ka la pynliem noh ïa ka Khliehiongriang da 1-0 kol lyngba u Geoge Ryngkhlem ha ka minit kaba 4.
Katba ka Dulong ka la pynliem ïa ka Moosalyngkat da 2-0 kol. Ïa kine la thep da u Wansa o Laloo ha ka minit kaba 59 bad u Sahame Sumer ha ka minit kaba 69.
