Shillong, Naiwieng 05
Ka Nongspung AYSCSA ka la jam sha ka semi final jong ka lympung ïalehkai 1st Division Football League ba la pynïaid da ka Tyrsad Area Sports Association (TASA).
Kane ka jinglah ban pyntikna ka la wan hadien ba ka lah ban pynliem noh ïa ka Pyndenumbri SC lyngba ka shi kol ba la thep da u Arjohnson K. Syiemïong (18) ha ka sngi Saitjaiñ ha madan Tyrsad.
Kane ka jingshah rem ka la pynlong ïa ka Pyndenumbri ba kan hap ban danghap ïakhun tyngeh ha ka jingïalehkai ba dangsah ban lait na ka jingshah pynhiar sha ka Second Division.
Ha ka jingïakhun jong ka Second Division, ka Mawrohroh SC ka la pynliem noh ïa ka Phanniewlah Rum SC da 2-0 kol. Ïa kine la thep da u Amonlang Shabong ha ka minit kaba 16 bad u Mejune star Rani ha ka minit kaba 59.
Haba phai sha ka Third Division pat la jop da ka Nongthymmai Neng SC ïa ka Laitryngwai SC da 1-0 kol.
Kane ka lympung kan bteng biang ha ka lah sngi U Blei (6 tarik) ha kaba ka jingïakhun jong ka Third Division kan long hapdeng ka Laitniangtlong pyrshah ïa ka Mawsingshad SC (11AM), katba ka Kyiem SC ïa ka Tyrsad Umkseh SC (1PM). Ha ka First Division kan long hapdeng ka Pomsanngut SC ïa ka Phudburnei SC (2:30PM).
