Baghdad, Naiwieng:
U Secretary of State jong ka US u Antony Blinken ha ka Sngi U Blei u la leit sha Baghdad hadien ka jingwan phai na ka jingleit jngoh sha West Bank ha katei kajuh ka sngi. U Blinken u la ioh ban iakynduh ia u Myntri Rangbahduh ka Iraq- u Mohamed Shia al-Sudani bad ia kiwei ki heh jong ka Iraq, kum shi bynta ruh ban ioh iakren halor ki katto-katne ki mat ba kongsan kiba iadei bad ka thma hapdeng ka Israel bad ka Hamas.
Katei ka jingleit jngoh jong u Blinken sha Baghdad ka long hadien ba u la leit jngoh bad leit shong jingialang shwa sha Cyprus, ban iakren halor ki lad jingiarap ban phah sha Gaza katba ka thma Israel ka dang neh.
Naduh kaba sdang hi jong ka thma ka Israel bad ki lehnoh Hamas, ki la don bun tylli ki jingjia shah thombor jong ki shipai bad ki ktem shipai ka US ha ki jong ka Iraq.
Kumta, ha katei ka sngi, u Blinken u la leit ban kren da kaba shai ba ka US kam lah ban pdiang ia ki jingmaham bad ki jingbyrngem jong ki lehnoh kiba don jingiadei bad ka Iran namar ka thma jong ka Israel ruh ka long hadien ka jingleh pyni bor hi jong ki lehnoh Hamas bad lada ym lah ban tehlakam ia ki ha kane ka por, kan long ka jingma kaba khraw ia kiwei ruh ki ri hadien- habud lada kitei ki lehnoh ki la kham khlaiñ bor ban ia ka Taliban kumba la jia ia ka Afghanistan, ba ki lehnoh Taliban ki la ioh ban synshar hi ia ka ri Afghanistan. Namarkata ruh u Blinken u la ong ba ka US kan ym aili ia kita baroh hynrei kan leh ia kat kiba ka lah ban iada ia ki paid nongshong shnong jong ka.
Namar kumba la iohi ia ki khubor ba la paw pyrthei ha kine ki taiew ba la leit, ka US ka la kynnoh ba dei ka Iran kaba iasnoh kti lang bad kito ki lehnoh kiba ther bom bad thombor sha ki ktem shipai ka US ha ki bynta khappud.
Hynrei kham bun na kitei ki kam thombor, la ju kam bad shim jingkit khlieh da ka kynhun lehnoh ba ju tip kum ka ‘Islamic Resistance in Iraq’.
Shuh shuh ruh la ong ba ka Iran ha kine ki taiew ba la leit, ka la kynnoh ba dei ka United States kaba kynshoit bad ai mynsiem ia ka Israel ba kan thombor bad ban kput ia ka Gaza namar ba ka kwah ioh jingmyntoi ialade bad ki la mih ruh ki jing byrngem ba ha rukom namar ka jingleit pynhiar kput jong ka Israel ia ki lehnoh Hamas bad namar ka jing bym kohnguh jong ka Israel ban sangeh noh ia ka thma.
