Shillong, Naiwieng 06
Ka tnat ïalehkai jong ka NEHU ka la sdang ïa ka lympung ïalehkai Inter College Cricket (Men) Tournament 2023 ha ka Lah Sngi U BLei ha phyllaw jong katei ka skulbah.
Ha kane ka sngi la ïadon lang u N. Das, Asst. Director (PE & Sports), NEHU cum Organising Secretary jong kane ka lympung nalor kiwei pat.
Ha ka jingïakhun kaba nyngkong, ka NEIAH, Shillong ka la khur ïa ka jingjop hadien ba ka la lah ban pynliem noh ïa ka Synod College da 63 run.
Hadien ba la jop ïa ka kynting pisa, ka Synod College ka la shimti ban kawang bol shwa nyngkong, ha kaba ka NEIAH ka la kamai 155 ru ha ki 20 over bad shah pynkhyllem baroh ki nongtied. Hynrei haba wan shimti ïa ka pali kaba ar ki nongtied ka Synod College ki la shah pyn-khyllem baroh ki nongtied na ka bynta ban kamai tang 92 run.
Haba phai sha ka jingïakhun kaba ar, ka St. Anthony’s College ka la pynliem noh ïa ka Shil-long Law College, Shil-long da 99 run. Ka St. Anthony’s College kaba la shimti ban tied nyngkong, ka la kamai 175 run ha ki 20 over bad shah pynhap 5 wiket. Hynrei haba wan shimti ïa ka pali kaba ar ka Shillong Law College ka la kamai tang 76 run bad shah pynkhyllem baroh ki nongtied.
Kane ka lympung kan bteng biang ha ka sngi Ba-ar ha kaba ka BBS College kan ïakynduh pyr -shah ïa ka St. Edmund’s College, katba ka NEHU, Shillong ïa ka Umshyrpi College.
