Shillong, Naiwieng 06
Ka Rangdajied United Foot -ball Club ka la pynbna paidbah ba kan leit ïashim bynta ha ka lympung ïalehkai Third Division I-League ban pynlong da ka All India Football Federation (AIFF) mynta u snem bad pyllait ruh ïa ka jersey kaba thymmai jong kane ka klob.
Haba ïaken bad ki nongthoh khubor ha ka Lah Sngi U Blei, u President ka synjuk u Bah Eugeneson Lyngdoh u la pynpaw ka jingsngew-kmen ba kum ka klob ha kane ka kynti kaba mynta kan leit ïashim bynta ha ka Third Division I-League jong ka AIFF. “Kane ka dei ka jingïohi jngai jong ka klob kaba ngi la buh ïa ka thong ba hapoh san snem ngin ïoh ban ïashim bynta biang ha ka lympung ïalehkai shabar jong ka Jylla namar kum ka klob ngi kwah ban plie lad ïa ki rangïalehkai ka Jylla ba kin ïoh ïa ka lad ban leit ïashim bynta shabar.”
“Lyngba ka jingtrei shitom ki coach bad baroh kiba la ïadon bynta bad ka klob, ngi la lah ban khur ïa ka nam lahduh ha ka Meghalaya State League mynta u snem ba la pynlong da ka Meghalaya Football Association. Kat kum ki kyndon aiñ ïalehkai ba thymmai jong ka AIFF ki long ba ki lahduh na ki jylla bapher bapher jong ka ri ki ïoh rung sha ka Third Division, hynrei ka shong pat ha ngi la ngi kwah ne em ban leit ïashim bynta,” la ong u Bah Eugene.
Ha kane ka kynti kaba mynta ka RUFC kan pynmih beit tang ïa ki rangïalehkai kiba dei ki Khasi ban leit ïashim bynta sha katei ka lympung.
“Kumba ngi ïohi ba ki khynnah ïalehkai ka Jylla ki long kiba don ïa ka sap ïalehkai ba kyrpang ha ka phutbol. Katei ka lympung ïalehkai Third Division ka long kaba bha tam eh na ka bynta ba ki rangïalehkai jong ngi ba kin pyni ïa ki sap ïalehkai jong ki. Te kumta da kawei ka jingmut ngi la rai ban leit ïashim bynta sha katei ka lympung,” u la bynrap.
“Lyngba kane ka lympung, ngi khmih lynti ba kine ki rangïalehkai jong ngi kin ïoh ban ïalehkai sa na kiwei pat ki klob ba paw jong ka ri bad ruh ba kin ïoh ïa ka lad ban mihkhmat ïa ka ri India ha ki lympung shabar ri.”
Ha kane ka jingleit shim bynta, ka RUFC ka la pynbna ruh ba ka tnat jngoh kai jong ka Sorkar Jylla lem bad ka BT27 kin long kum ki nongbei tyngka ïa ka klob na ka bynta katei ka lympung.
Ha kane ka lympung ïalehkai kaba thymmai ki don haduh 25 tylli ki klob ki ban ïoh ïashim bynta ha Goa. Kine ki long ka RKM F.A & New Friends Dantewada (Chhattis-garh), Vatika FC & Garhwal (Delhi), Dempo & Sporting Goa (Goa), Baroda FA & ARA (Gujarat), Bengaluru & Kickstart (Karnataka), Lake City (Madhya Pra-desh), International FC Phagwara & Doaba United (Punjab), Jaipur Elite (Rajasthan), Millat FC (Maharashtra), Bhawa -nipore FC & Diamond Harbour FC (West Bengal), Kerala United (Kerala), Rangdajied United (Meghalaya), KLASA F.C & KIYC F.C (Manipur), United Chirang Duar (Assam), Sports Odisha (Odisha), Abbas Union FC (Telangana) bad ka Jeppiaar Institute of Technology Pondicherry (Pondicherry).
