Shillong, Naiwieng 06
Ka Meghalaya Police Football Team ka la long ka kynhun kaba nyngkong eh ban jam sha ka semi final ha ka lympung ïalehkai 3rd Division Football League 2023 ba la pynïaid da ka Shillong Sports Association, hadien ba ka la lah ban pynliem noh ïa ka Sanmer SC da 7-2 kol.
U Ambrus Syngkli u la thep ar kol, katba ïa ki shi kol la thep da u Wesmanwell L. Marshillong, Wan-khraw Nengnong, Aldrin Monlang Ramsiej, Pynshailang L. Lyngkhoi bad u Alfoster Sunn.
Ha kane ka jingïakhun kaba la long ha ka lah sngi U Blei ha 1st Ground (SSA Stadium) Polo, ka MLP ka la lah ban pynpaw ïa ka jingkhlaiñ bor ha ka rukom ïalehkai ha kaba ka la ïoh ban pynkhih jar nyngkong eh lyngba u Wesmanwell ha ka minit kaba 18 na ka bynta ban tam shi kol haduh kaba kut jong ka kylla step.
Hadien ba la bteng ïa ka jingïakhun jong ka kylla miet ka MLP ka la pynbud biang ïa ka kol kaba ar lyngba u Wankhraw ha ka minit kaba 49 bad hadien ar minit ka la thep biang lyngba u Ambrus. Ka MLP ka la thep biang sa ar kol lyngba u Aldrin Monlang (57) bad u Pynshailang (61) na ka bynta ban tam haduh 5-0 kol.
Watla ka Sanmer ka la shah thep haduh 5 kol, hynrei ka la lah ban pynphai kylla ar kol lyngba u Bryan Kharbudnah (62) bad u Aaron Kharbudnah (74). Shwa ban wai ka MLP ka la thep biang sa ar kol ha ka minit kaba 80 lyngba u Ambrus bad u Alfoster Sunn na ka bynta ban khur syndon ïa ka jingjop.
Ka jingïakhun quarter final kaba ar kan long ha ka sngi Ba-ar hapdeng ka Pay For Right Football Academy pyrshah ïa ka Lawmali Pyllun SC ha ka por 2 baje janmiet.
