Jerusalem, Naiwieng:
U Myntri Rangbahduh jong ka Israel, u Benjamin Netanyahu, ha ka Sngi U Blei u la kyntait ia ka jingkyrpad bad jing kyntu jong kiba bun ban sangeh noh ia ka jingleit hiar thma sha Gaza. Nalor nangta u la ong ba ka Israel kan nym sangeh ia ka thma katba ka Hamas kam pat pyllait lut ia baroh kito kiba ka la rahbor naduh ba sdang jong ka thma ha ka 7 tarik u Risaw.
Kumta, u Netanyahu u la ong ba ka Israel kan nym aili ia ka Hamas ban pyni bor bad ban wanrah jingma ia ka Israel sa shisien pat hadien-habud bad kumta ruh ka Israel kan phah ñion ia ki shipai jong ka tat haduh ba ka Hamas kan pyllait hi dalade bad da kaba suk ia kitei kiba ka la dep rahbor baroh.
Kumjuh ruh u Netanyahu u la ong ba kane ka long ka khubor sha baroh ki paralok bad ki nongshun jong ka Israel bad kam pher watla ki la kyntu bad kyrpad ia ka Israel ban sangeh noh ia ka thma hynrei kan nym leh ia kata da lei-lei ruh katba kitei ki lehnoh kim pat pyndem bad pyllait lut noh ia baroh kiba ki la dep rahbor naduh ba sdang jong ka thma.
La ong ba ki nong-ialam kiba bun naduh u Myntri ka tnat kam bar ri ka Qatar, Saudi, Egypt, Jordan bad kumjuh ruh ki nong-ialam ka United Arab Emirates ki la iakynduh bad u Secretary of State jong ka US u Antony Blinken hapoh Amman, Jordan ha ka Sngi Saitjaiñ ban kyntu ia u ba un pynkohnguh ia ka Israel ba kan sangeh noh ia katei ka thma.
U President ka Palestine u Mahmoud Abbas lei u la dawa ia ka Israel ba ka dei ban sangeh noh shi syndon ia katei ka thma bad ia kane u Abbas u la kren ha ka jingiakynduh bad u Blinken ha ka por ba u (Blinken) u la weng noh ia ka jingpynbna ban leit jurip sha ka thaiñ West Bank kaba la ioh kurup da ka Israel.
La ong ba u Blinken ha katei ka sngi u la leit poi biang sha katei ka thaiñ ha ka sien kaba ar, da ka jingtrei shitom jong ka United States ban ialeh kumno ban tehlakam ia ka thma Israel khnang ba kan ym pur sha kiwei pat ki bynta.
Hynrei, u Blinken u la ong ba, ka jingsangeh ia ka thma Israel, kan long pynban ka jing- ailad ia ka Hamas ba kan nang khlaiñ bor bad ban ioh wanrah biang ia ki kam thombor hadien- habud. Katba, u Blinken u la kyntu pat ia ka Israel ba kan sangeh shuwa shipor tang ban ioh pynpoi ia ki mar bam bad ki jingiarap sha ki paid nongshong shnong ka Gaza.
Ka tnat ka koit- ka khiah jong ka Gaza ha ka Sngi U Blei, ka la pyntip ba kumba 9,770 tam ki nong Palestine ki la khlad ha ka jingther bom jong ka Israel naduh ba sdang jong ka thma hadien ba ka Israel ka la pynhiar kput ia ka Gaza namar ka jingleit thombor jong ki lehnoh Hamas ia ka Israel ha ka 7 tarik u Risaw, ha kaba palat 1,400 tam ki nong Israel ki la duh ei ia ka jingim bad da ki spah ngut ruh kiba mynsaw bad kiba shah rahbor ha ki lehnoh Hamas naduh katei ka sngi ba sdang jong ka thma.
