Shillong, Naiwieng 07
Ka jingïaid lynti ka Meghalaya ha ka 37th National Games ka nang-hiar arsut ha kaba kam pat shym la lah ban khur wat tang kawei ka takma haduh ka sngi kaba khadlai jong kane ka lympung kaba dangïaid mynta ha Goa.
Ha kane ka lympung ka Jylla ka la phah haduh 45 ngut ki nongïashim bynta ha ki khyndai tylli ki jingïalehkai kiba kynthup ïa ka Athletics, Football ki shynrang, Swim -ming, Wushu, Boxing, Golf, Shooting, Kayak bad ka Sqay kaba dei ka jingïalehkai martial arts.
Na ka liang ka Jylla ka la khmih lynti ban khur takma na ka kynhun ïalehkai phutbol namar kiba bun na ki rangïaleh -kai ki dei kiba la ïadon bynta bad ka kynhun kaba la wan ba-ar ha ka Santosh Trophy mynta u snem, phewse kane ka kynhun hapoh ka jingïalam u Bah Khlaiñ Pyrkhat Syiemlieh ka la shah rem noh tang ha ka jingïalehkai group bad kamai tang shi point na ki lai sien ïakhun. Ha kane ka kynti kaba mynta ka Jylla ka la ap khmih lynti sa na ka Shooting bad Golf namar ki dangsah satang kina ki jingïalehkai kiba ka Jylla kan pyndep ha kane ka lympung.
Haduh kane ka sngi kaba khadlai, ka Maha-rashtra ka dangïai bat ïa ka kyrdan ba hakhlieh duh da kaba kamai 199 tylli ki takma (68 ksiar, 63 rupa bad 68 rnong). Ka Servi-ces kaba la wan ba-ar ka la kamai 109 ki takma (54 ksiar, 23 rupa bad 32 rnong), ïa ka kyrdan balai la bat da ka Haryana kaba la kamai 142 ki takma (50 ksiar, 38 rupa bad 54 rnong). Ka Karnataka ka la wan ba-saw da kaba kamai 77 ki takma (28 ksiar, 23 rupa bad 26 rnong). Ka Madhya Pradesh ka la wan basan da kaba kamai 88 ki takma (27 ksiar, 32 rupa bad 29 rnong).
Ka Manipur ka la long ka jylla kaba nyngkong eh na ka thaiñ shatei lammihngi kaba la wan ha ka kyrdan ba hynriew bad kamai 68 ki takma (26 ksiar, 19 rupa bad 23 rnong). Ka Assam ka la long kaba ar na kane ka thaiñ ka la khur 42 ki takma (10 ksiar, 14 rupa bad 18 rnong). Ka Mizoram ka la kamai 4 ki takma (2 ksiar & 2 rupa), ïa ka kyrdan ba 28 la bat da ka Nagaland kaba la kamai 6 ki takma (1 ksiar, 2 rupa bad 3 rnong). Ka Tripura u la wan ba 31 da kaba khur kawei ka takma rupa. Ka Sikkim ka la lah ban pynpaw ïa ka jingtbit na ka bynta ban khur kawei ka takma rnong.
Kumba ka paw ha ka 36th National Games kaba la long ha Gujarat, ka Meghalaya ka la wan ha ka kyrdan ba shatrai bad kam shym la lah ban khur wat tang kawei ka takma bad kane ka pyni ba kam shym la long ba la pynkhreh hashwa ba kan leit ïashim bynta.
“Ka jingleit shim bynta ka long kaba kong-san ban ïa kaba khur jingjop, ka dei ka motto jong ka kam ïalehkai. Ngi dang sdang bet mynta ar snem kumno ngin jop noh, kane kan shimpor da ki snem ban ïoh ïa ki nongïalehkai kiba kynsai ki ban lah ban ïakhun bad ki nongïaleh-kai kiba la ju mihkhmat ïa ka ri. Te kumta ngi dei ban long kiba ïai shah,” la ong u General Secretary ka MSOA u Bah Finely Pariat.
