Hadien ba ka Meghalaya Football Association (MFA) ka la dep ban pynthymmai ïa ki nongkitkam na ka bynta ka samoi treikam 2013-17, ka la don ka jingthmu ban kyntiew ïa ki jingïalehkai phutbol hapoh ka Jylla naduh ki khynnah (Youth League) bad ruh kiwei ki jingdonkam. Na ka liang U Nongsaiñ Hima u la ïoh ban ïakren bad u Secretary ka MFA.
UNH: Kaei kaba pynlong ïa phi ban wan shakhmat sha kane ka bynta ban long kum u Secretary ka MFA ?
Sunesh: Kum u rangïalehkai phutbol barim, nga la long teng kum u Secretary jong ka Meghalaya Football Players Association (MFPA) la bun snem. Kane ka la ai ïa ka rynsan ïa nga ba ngan sngewthuh ïa ka jingdonkam ban kham kyntiew ïa ka phutbol ha ka Jylla jong ngi khamtam lei lei ha kaba ïadei bad ki khynnah rit. Kane ka la ai mynsiem ïa nga ba ngan shim khia ïa kane ka kam. Ha kaba ïadei bad kane, nga sngew ban ai khublei ïa u Bah Larsing M. Sawyan, President barim ka MFA, uba la pynshlur ïa nga bad uba la wanrah ïa nga sha ka MFA naduh ki snem ba la leit bad uba la kyrshan bha ïa nga ha ka por ban nga long kum u Chairman jong ka Youth Committee ha ka Executive Body ba la leit jong ka MFA.
UNH: Kaei kaba phi ïohi ïa ka jingkhlaiñ bad ka jingduna ha kaba ïadei bad ki lad ki lynti na ka bynta ban kyntiew ïa ka jingïalehkai phutbol hangne ha ka Jylla bad kaei kaba phi thmu ban leh ha kane ka kynti kaba phi la ïoh ban shimti kum u Secretary?
Sunesh: Ka jingkhlaiñ ka ka long ba ngi don bun ka sap jong ki khynnah ha kane ka Jylla jong ngi, hynrei dangdon pat bun ki jingduna ban leh na ka bynta kane khamtam ha ka ban khambun ki madan kiba paka khamtam ha ki District Headquarter bad ki Sub-Division bad ruh ban pynurlong ïa ka Meghalaya Youth League kaba la dep saiñdur mynta la ar ne lai snem.
UNH: Kaei ka thong jong ka MFA na ka bynta ban pynkhlaiñ ïa ka jingïalehkai phutbol khamtam ïa ki khynnah kiba dangkhie dangsan?
Sunesh: Ngi donkam ban pyntyllun ïa ka kata ka “ecosystem” khamtam ïa ki khynnahrit da kaba pynlong thikna ïa ki lympung ïalehkai na ka bynta jong ki ha ki district bad ban sa pynbud pat sha ka state level manla u snem.
UNH: Kumno phin leh ban kyntiew ïa ka grassroots development ha kane ka Jylla, khamtam ha ki jaka bapher jong ka Jylla?
Sunesh: Ngi donkam ban pynshlur ïa ki ‘affiliated association’ jong ka MFA ba kin pynlong thikna ïa ki lympung ïalehkai na ka bynta ki khynnah rit jong ki rta bapher bapher kum ki U-14, U-15 bad U-17 ter ter ha ki district level.
UNH: Phi lah ban shu ai jingmut na ka bynta ban pynkiew ïa ki lad ki lynti ban kyntiew khamtam ban shna ïa ki madan ïalehkai kiba paka bad ki jaka ai jinghikai?
Sunesh: Nga kyrmen ba ka Sorkar kan wan shakhmat da ka jingthmu ban pynurlong ïa ki lad ki lynti ha ka ban wanrah bad shna ïa ki madan kiba paka khamtam ha ki district bad ki sub-division bapher bapher jong ka Jylla.
UNH: Kumba ka Jylla ka don ïa ka kolshor kaba don ka tynrai ki riewlum. Kumno phi sngew ba kine baroh kin wan kum ka jingmyntoi ha ka ban pynroi ïa ka jingïalehkai phutbol ha ka Jylla jong ngi?
Sunesh: Ka phutbol ka la don lypa ha ka snam jong ngi. Kumba nga la ong, ngi phai khmat sha ka Sorkar bad kumjuh sha ki kompani, ki riew ïeid phutbol ban wan lang shakhmat ha ka ban kyntiew ïa ka jingïalehkai naduh ki grassroot level.
UNH: Ka jingdon jong ka fund bakhlaiñ ka long kaba donkam eh ban pyntyllun ïa ki kam bapher bapher jong kano kano ka synjuk ïalehkai. Kumno phi pyrkhat na ka bynta ka jingbei tyngka na ka bynta ki kam jong ka MFA?
Sunesh: Ngi ai khublei shibun eh ïa ka Sorkar Jylla kaba ju kyrshan ïa ngi mynta la bun snem. Ka dei tang ki sien jam bad ki kam ba ngi dei ban ïaid ha ka rukom kaba biang bad ha ka lynti ïaid kaba beit ha ka ba ngi lah ban ïai ïoh ki jingkyrshan na ka liang ka Sorkar.
UNH: Kiei ki symboh pyrkhat ba phi don ban ïajan bad ki shnong bad ki paidbah, ki nongkyrshan ha ka ban pynjanai shuh shuh ïa ka jingïalehkai phutbol ha ka Jylla?
Sunesh: Kawei ka long ba ngi dei ban pynlong khambun sien ïa ki workshop bad ki seminar ryngkat bad ki ‘affiliated sssociation’ jong ka MFA ha ka ban ïoh ban ïapylliew jingmut da ka pynlong ia ki lympung ïalehkai kiba paka na ka bynta ki khynnah ha ki rta bapher bapher.
UNH: Khatduh eh, kum u General Secretary, kumno phi pyrkhat ban kyntiew na ka bynta ki coach, rephri, bad ïa baroh kiba don bynta ban pynïaid ïa ka phutbol ha ka Jylla?
Sunesh: Ngi donkam ban pynkhlaiñ ïa ki komiti bapher bapher jong ka MFA. Kumba nga la ong ka lynti kaba beit ba ngin ïaid ha ka rukom kaba dei ka long ka mat kaba donkam eh ban kyntiew ïa ki kam jong ka MFA. Kum ka synjuk ha ryngkat ki dkhot kiba thymmai, ngi peit shakhmat ban wanrah ïa ki jingai jingmut ki ban kyntiew ia ka synjuk, lada ym dei kaba radbah, hynrei kat kaba ngi lah na ka bynta ka jingkylla ha ka ban kyntiew bad ban pynjanai shuh shuh na ka bynta ka bit ka biang jong baroh.
