C. B. Iawphniaw
Ka dustur ka riti uba rim kam ïathuh shai ba ki ai jaid ha ka kmie. Dei ban ai jaid ym tang ha ka kmie ne kynthei hynrei ki ai jaid na u shynrang ruh. Dei ban ai jaid lang ha u kpa (Shynrang) ruh. Ka shong ha ka mon jong ki khun. Ka jingai jaid tang ha ka kmie ka long ka jingleh shiliang ïa ka hok longbriew manbriew. Ka ai jaid kmie kam dei ka dustur ka riti u longshuwa manshuwa.
Ka dei ba shu thaw stad da mano-re-mano ban phiah (Divide) ïa ka jaidbynriew. Kane ym dei ba bishni ïa ka ai jait kmie, namar nga ruh nga shim jaid kmie. Hynrei hap ban pyrkhat ïa kito kiba kwah pynneh ïa ka dustur ka riti ai jait kpa, na ka bynta ka jingbha ka kur ka jaid bad ka jaitbynriew. Ka District Council kaba dei peit ïa kane ka bynta ka dei ban da pyrkhat bad pynshong nongrim bha ïa kane ka rukom ai jaid tang na ka kmie.
Namar ka long kumba ïuhroit ïa ka dustur ka riti u mynbarim mynbajah. Ka ai jaid la dei ban shim na u symbai ba bet ym na ka khyndew. Namar ïa ki khun na ki kpa ym dei Khasi wat la ka kmie ka dei Khasi ruh ym dei ban shah ba kin ai jait kmie (Khasi).
Kumjuh ïa ka kmie bym dei Khasi bad kaba ioh ïa u kpa /tnga Khasi paka ïa ki khun dei ban shah ban ai jaid na u kpa (Khasi). Namar u symbai u long kordor u long u symbai Khasi paka.To ngin ai noh ïa ka jaid sha u kpa lane to ngin ai noh ïa ka jait katba kiba kwah ban shim na ka kmie ne na u kpa, ban lait na ka jingia kynad hadien habud ha ka kur ka jait hapdeng u shynrang bad ka kynthei.
