Tel Aviv, Naiwieng:
Sa shisien pat la ong ba ka Israel ha ka miet Sngi U Blei ka la khang biang ia ka Internet bad ia baroh ki laiñ iakren phone sha Gaza Strip ha ka sien kaba lai (3) naduh ba sdang ka thma ha ka 7 tarik u Risaw tat haduh katei ka Sngi U Blei.
Na ka liang ka tnat ba dei khmih ia ki laiñ iakren phone jong ka Israel ha katei ka Sngi U Blei, ka la pyntip ba katei ka tnat kan hap ban khang biang noh ia baroh ki laiñ iakren phone bad kumjuh ruh ia ka internet hapoh Gaza Strip kumba la bthah da ki bor pyniaid ka Israel.
Tang hadien kumba katto-katne por pat ba la pynmih ia katei ka jingpynbna, ki shipai ka Israel ki la ther bom sha Gaza bad sha ki jaka ba marjan jong ka phang Shathei.
Katei ka jingbthei ki bom ba la ther na ki shipai ka Israel, la ong ba ka long kaba la sawa jam haduh katta, ha kaba la lah ban ïohsngew wat naduh Rafah jong ka thaiñ South ka Palestine ruh.
