Beijing, Naiwieng:
Namar ka jingjur palat jong ka jinghap thah ha ka thaiñ Shatei Lam Mihngi jong ka China, ki bor pyniaid kane ka Ri ha ka Sngi Nyngkong ki la pynsangeh noh ia ki liengsuiñ na ka thaiñ Shatei kum na Heilongjiang bad kiwei kiwei ki nongbah ha katei ka sngi. Katei ka jingjur ka jinghap thah ka la pynlong ruh wat haduh ba hap ban khang khyrdep shuwa ia ki skul shi por. Ha katei ka sngi, ka Heilongjiang ka la pynsangeh noh ia 49 tylli ki liengsuiñ jong ka kiba dei ban treikam na ka Kad Liengsuiñ kaba don ha ka nongbah Harbin.
Kumta, la ong ba hajan baroh ki bynta jong ka Harbin, la pynsangeh noh ia ki skul, kindergartens bad ia kiwei kiwei de ki kam kiba lah ban pynsangeh shuwa shi por namar ka jing bym biang jong ka suiñ bneng bad kaba lah pat ban ktah ia ka koit- ka khiah jong ki briew namar ka jingdeit-thah kaba jur.
Ka tnat khmih suiñ bneng jong ka China ka la maham ruh ia ka jingkhriat kaba jur ha katei ka phang ha kine ki sngi ki ban wan.
La ong ba katei ka jinglong jong ka suiñ bneng ka kylla kynsan- kynsan ha ka por shiteng miet jong ka kylla step Sngi U Blei bad Sngi Nyngkong.
Kumta la ong ba la khmih lynti ruh ia ka jinghap thah ha ki katto katne ki bynta jong ka Inner Mongolia, ha Hebei, ha Jilin bad kumjuh ruh ha ki bynta jong ka Liaoning.
Ka Liaoning bad ka Jilin ruh ki la pynsangeh noh shwa ia ki jingpule namar katei ka jingkhriat bad jingdait-thah kaba jur.
Ka tnat Central Meteorological Observatory ka la maham ruh ba ka jingkhriat ha kine ki kynta ki ban wan ka lah ban kiew haduh 6 lane 10 Degree Celsius, ha kaba katto katne ki bynta jong ka ri kin hap ban mad ia ka jinghap ior ne jingrben thah ha ka jingdait-thah kumba 16 Degree Celsius eiei.
Kumjuh ruh ha ka Sngi U Blei, la ong ba katei ka tnat CMO ka la maham lypa ia ka jing rben thah da ka ‘Orange Alert’ na ka bynta ki katto katne ki bynta ka China, katba ka tnat National Meteorological Center jong ka China pat ka la maham da ka ‘Orange Alert’ halor ka jinglah ban jur ka jinghap thah bad ha kajuh ruh ka por ka la ai da ka ‘Blue Alert’ ia ka jingjur ka lyer deit-thah ha kitei ki bynta jong ka ri.
