Shillong, Naiwieng 07
Ka Pay For Right Football Academy ka la pynliem noh ïa ka Lawmali Pyllun SC da 4-0 kol na ka bynta ban jam sha ka semi final ha ka lympung ïalehkai 3rd Division Football League 2023 ba la pynïaid da ka Shillong Sports Association.
Kane ka la wan urlong lyngba ki kol ba la thep da u Samlang Rympei, Robi Maring, Thymmaibor Mukhim bad u Fairming Suting.
Ha kane ka jingïakhun quarter final kaba ar kaba la long ha ka sngi Ba-ar ha 1st Ground SSA Stadium Polo, ka jingïakhun ka la long kaba ïakhaid bha ha kaba baroh ar ki kynhun ki la ïakhun tyngeh, hynrei kim shym la lah ban thep.
Hadien shiteng kynta ka PFR ka la ïoh ban pynkhih jar nyngkong eh lyngba u Samlang Rympei ha ka minit kaba 38. Kane ka kynhun ka la thep biang ïa ka kol kaba ar lyngba ka penalty ba la shut da u Robi Maring ha ka minit kaba 46.
Ha ka kylla miet ka PFR ka la thep biang sa ar kol lyngba u Thymmaibor Mukhim ha ka minit kaba 51 bad u Fairming Suting (57) na ka bynta ban khur syndon ïa ka jingjop.
Ka jingïakhun quarter final kaba lai kan long ha ka 10 tarik ha kaba ka Mylliem Lum SC pyrshah ïa ka Nongmynsong SC ha ka por 2 baje janmiet, katba ha ka sngi kaba bud (11 tarik) ka Tynring SC kan ïakynduh pyrshah ïa ka Nongkseh SC na ka bynta ban ïaknieh rung sha ka semi final.
