Manila, Naiwieng:
Katkum ki khubor, la ong ba uwei u nongkren ‘Radio’ u la shah siat iap hapoh ka jaka treikam jong u ha Philipines ha ka Sngi U Blei bad la ong ba ka Philippines ka la mad ia shibun ki jingjia bad jingshah siat iap ki nongthoh khubor bad ki nongtrei jong ki tnat pathai khubor.
U Juan Jumalon, u la don 57 snem ka rta bad u la shah siat iap hapoh ka jaka treikam ‘Studio’ jong u kaba don hapoh ka iingsah jong u sha ka phang Southern jong ka dew lynnong hapoh Mindanao, ha kaba uwei u runar u la leit rung beit- beit sha ka iingsah jong u bad u la ioh siat ia u na ki bynta jong ka khlieh.
U Jumalon u long u nongthoh khubor uba 4 ban shah siat iap naduh ba u Ferdinand Marcos u la shimti ia ka shuki President jong katei ka ri ha u Jylliew jong u snem 2022.
La ong ba kane ka ri ka long ka ri kaba ap jingma tam bad ka bym don jingshngaiñ ia ki nongthoh khubor, ha kaba kito ki runar kiba don kti ruh kim ju shah pynshitom bad ki shu lait ei kumto.
U Marcos ha ka Sngi Nyngkong, u la pynrem jur halor katei ka jingshah pyniap jong utei u nongkren ‘Radio’ bad u la bthah ruh ia ki bor pyniaid ba kin pynïoh ia ka jingbishar kaba hok bad ban thwet ia ki runar kiba don kti ha katei ka kam bad ban ai ruh da ka jingpynshitom kaba eh bad kaba iadei bad ka jingleh pynkheiñ aiñ jong ki.
U Marcos ha katei ka sngi, u la ong ruh ba ka jingthombor ia ki nongthoh khubor ka long kaba sniew bad kaba bakla haduh katta katta bad ym dei ban ailad ia kane hapoh ka ri synshar paidbah. Namar kata ruh u la ong ba kito kiba wanrah jingma ia ka jingim jong ki nongthoh khubor, ki dei ban shah pynshitom bad ban shah pynngat ruh ha ki kyndon pynkheiñ aiñ kiba eh khnang ba yn lah ban tehlakam ia kum kine ki jingjia hadien- habud.
Ki pulit ki la iathuh ba utei u runar u la iohlad ban rung ha katei ka jaka treikam jong utei u nongkren ‘Radio’ da kaba thok ba u kwah ban ai jingkren ‘On- Air’ sha ki paidbah nongsngap.
Bad ha katei ka sngi, tang mar ia dep leh ia katei ka kam runar, u la phet krad noh na katei ka jaka. U Jumalon u la khlad noh tang hadien khyndiat por ba la pynpoi ia u hapoh hospital namar ka jingmynsaw ka dei na ki bynta jong ka khlieh bad kumta ka la kham shem jingeh ia ki doktor ba kin pyn-im ia u.
Ia katei ka kam ruh ki pulit ki la iohi bad ki la lap lyngba jong ka video ba la ioh ring da ki CCTV Camera kiba la pyndait ha katei ka jaka trei jong u.
Ha katei ka video ba la ioh ring, la iohi ruh ba utei u runar u la siat ia u Jumalon haduh 2 sien siat bad hadien kata u la bthat ia u kynjri ksiar ba u deng na ryndang hashwa ba un phet noh syndon na katei ka studio.
Ia ki jingtip kiba bniah yn sa lah ban ioh hadien ba ki pulit ki la dep ban pyndep lut ia ka jingtohkit baroh.
