Shillong, Naiwieng 07
Ka kynhun ïalehkai ka Jylla ka la hap ban wanphai thylli sha la ïing hadien ba kam shym lah ban khur wat tang kawei ka takma ha ka 37th National Games kaba la long ha Goa.
Wat la ka Jylla ka la phah haduh 45 ngut ki nongïashim bynta ha ki khyndai tylli ki jait jingïalehkai kiba kynthup ïa ka Athletics, Football ki shynrang, Swim-ming, Wushu, Boxing, Golf, Shooting, Kayak bad ka Sqay kaba dei ka jingïalehkai martial arts.
Hadien ka jingbym lah ban pynurlong ka kynhun ïalehkai phutbol kaba la shah rem tang ha ka jingïalehkai group, ka Jylla ka la khmih lynti sa na ka Shooting bad Golf, hynrei ki nongïalehkai na kine ki ar tylli ki jingïalehkai ki la shah rem noh ha ka sngi Balang.
Lah ban kdew ha ka 2nd North East Olympic Games kaba la long ha u snem ba la lah ha kane ka nongbah, ka Meghalaya ka la wan ha kyrdan basaw kata hadien ia ka Manipur kaba la wan ba nyngkong, Assam bad Arunachal Pradesh, hynrei ha ka National Games kaba la long ha Goa ka la wan ba shatrai eh na baroh ki jylla jong ka ri hi baroh kawei.
Haduh kane ka sngi kaba shiphew, ka Maharashtra ka la long ka jylla kaba nyngkong eh ban kynjoh sha ki 200 tylli ki takma. Kane ka jinglah ban kynjoh sha ki 200 tylli ki takma ki la wan lyngba ka Mansi Mohite kaba la khur ia ka takma ksiar ha ka sngi Ba-ar ha ka Triathlon Mixed Relay. Kane ka jylla ka la lah ban pynpaw ruh ka jingtbit ha ka Hockey, Handball, Kabaddi, Kho-Kho, Football bad kiwei ki jingïalehkai.
Haduh ka sngi Balang ka Maharashtra ka la khur haduh 208 tylli ki takma kiba kynthup ïa 71 ki takma ksiar, 65 ki rupa bad 72 ki rnong. Ïa ka kyrdan ba-ar la bat da ka Services (59 ksiar, 25 rupa & 33 rnong), ka Haryana ka la wan balai hadien ba ka la khur 53 ki takma ksiar, 48 ki rupa bad 60 ki rnong.
Ha Madhya Pradesh ka la wan basaw da kaba khur 35 ki takma ksiar, 33 ki rupa bad 34 ki rnong. Ka Manipur ka la wan ha ka kyrdan basan da kaba 30 tylli ki takma ksiar, 22 ki rupa bad 26 ki takma rnong.
