C. B. Iawphniaw
Ka ktien ki riewtymmen ne ki longshuwa manshuwa ka ong kumne : Haba kynih ka syiar kynthei ka pyrthei ka la wai. Kane ka kren pharshi ïa ka jingkwah ki kynhun seng longkmie ki dawa ban ioh bynta ha ki Dorbar shnong. Kane ka long ka jingkwah rhah ban pyntroiñ ïa ka dustur ka riti u longshuwa u manshuwa. Ha ri Khasi ba ieit jong ngi naduh ki por mynbarim kim ju shah ne ai lad ïa ki kynthei ban ia don bynta ha ka synshar khadar jong ki shnong ki thaw. Dei kane ba ki tymmen ki sa pynmih ïa kine ki kyntien haba kynih ka syiar kynthei ka pyrthei ka la jan wai. Namar kumba ngi tip ka syiar kynthei hi kam ju kham kynih, dei tang u ïar ryng-kuh uba don ka hok ban kynih. Ha ka jingshisha ngi dei ban burom ia ki dustur ki riti kum ki matti barim u longshuwa manshuwa u la lam lynti na ka bynta ka jingbha ka ri bad ka jaitbynriew. Ki kynthei ki dei ban sngewthuh ba lada yn pynkylla noh ïa ka ai jait shim jait na ka kmie ha u shynrang hato ngi sngewkmen ne ngi sngewsih haba ka dustur ka riti ka la ai ïa ka jait ka khong ha ki kynthei ne kmie? Kane ka long tang ha ki kam synshar khadar ha ki shnong ki thaw ba u longshuwa u manshuwa um ju ai lad ïa ki kynthei ban shong hapoh Dorbar. La dei ha Dorbar shnong ne Dorbar hima. Ha kiwei kiwei te um ju khang. Namar ki longkmie ki dei ki nongpeit nongkhmih ïa ka ïing ka sem bad ïa ki khun ki kti. Kim dei ban kwah knieh noh ïa ka kam ki Rangbah da lei lei ruh, wat la ka don ka jingkylla katkum ka por. Ki dei ban kham shim khia ïa ki kam ïing kam sem bad ban peit ïa ki khun ki kti bad ri ïa ka kmie ki kpa kiba la tymmen shong prah shong shang. Kane ka dei ka rukom jong ki kynthei ban sumar ïa ki kmie ki kpa ha kiba bun ki liang. Ki dei ban sumar ïa ki kmie ki kpa ha ki ïing ki sem ym ban padiah ne ym ban knieh ïa ka kam ki Rangbah ha kano kano ka rukom ruh.
