Kyiv, Naiwieng:
katkum ki khubor, la ong ba u Commander-in-Chief jong ka Ukraine u la duh noh ïa ka jingim hadien ba u bom ba la pynpoi sha u kum ka jing-ai sngewbha ka song, u la bthei ha ka Sngi Nyngkong.
U heh shipai ka Ukraine, u Valery Zaluzny ha katei ka sngi, u la ïathuh ba utei u heh shipai, uba la ju ithuh kum u Major Gennadiy Chastiakov, uba long ruh u paralok ba ïajan bha bad u, ha katei ka Sngi Nyngkong u la ïoh pdiang ïa kawei ka song jing-ai sngewbha kaba don hapoh ïa u bom ‘Grenade’, ha kaba utei u bom u la bthei ha ka por ba utei u shipai u la plied ïa katei ka song ba la ïoh pdiang sngewbha.
U Myntri ka tnat kam poh ïing- u Igor Klymenko u la ïathuh ba u Chastiakov u la pyni ha u khun jong u ïa ka synduk kaba dap da ki bom ‘Grenade’, ïa kiba u la ïoh pdiang kum ka jing-ai sngewbha ha katei ka sngi.
Ha kaba nyngkong la ong ba utei u khun mu la shim ïa kitei ki bom ha ka kti jong u bad pyrshang ban pynphai ïa i kynja jingtan iba don ha utei u bom bad hadien kata, uwei na ki nongbud jong utei u heh shipai, u la shim bad rah noh ia kitei ki bom na ka kti jong utei u khun bad u la phut ia itei i jingtan ‘ring’ bad kaba la pynlong ïa utei u bom ba un bthei bad baroh kiba don ha katei ka jaka ki la ngat ha katei ka jingbthei ha katei ka por.
Ki pulit ki la ïoh ruh ban pynithuh ia utei u shipai uba leit ban ai sngewbha da kitei ki bom sha utei u heh shipai bad ki la ïoh kurup ruh sa 2 tylli ki bom kiba kum kitei hi na utei u shipai hadien ba ki la ïoh ban kem noh ïa u.
Kumta, la ong ba ka tnat tohkit kan dang pynïaid ïa ka jingtohkit halor ka jingthmu ba sha lyndet jong utei u shipai haba ïadei bad katei ka jingleit ai sngewbha jong u da kitei ki bom sha utei u heh shipai.
U Chastiakov ha kane ka por, u la ieh noh shadien ïa ka kurim bad 4 ngut ki khun jong u, da ka jingsniew bok ha ka jingbym phikir jong utei u nongbud jong u ha katei ka sngi.
Shuh shuh ruh la ong ba naduh ba sdang jong ka thma ka Russia bad Ukraine, u Chastiakov u la aiti met bad mynsiem ban ïakhun na ka bynta ka ri bad ban ïaleh pyrshah ïa ki shipai jong ka Russia.
