Shillong, Naiwieng 08
Ka Shillong Lajong Football Club kan pynkhreh ïa ka jingïakhun ha ka lympung ïalehkai I-League pyrshah ïa ka NEROCA kaba na Manipur ha ka sngi Palei ha 1st Ground, SSA Stadium, Shillong.
Kane ka long ka jingïalehkai kaba nyng-kong eh jong ka Lajong ha la ïing hadien ba ka la wanphai na ka jingïakhun ha West Bengal na ka bynta ban ïakhaid mar 1-1 kol pyrshah ïa ka Moham-medan Sporting.
Ka NEROCA ka dei ka kynhun kaba dang shah rem ha ki ar tylli ki jingïalehkai ba la dep, kata ha ka Sreenidi Deccan da 4-0 bad ka Gogulam Kerala da 4-1 kol.
Halor kane ka jingïakhun, u coach ka Lajong u Bah Bobby L. Nongbet u la pynpaw ba ka kynhun ka la long ba la pynkhreh ban ïakhun tyngeh ha kane ka jingïalehkai kaba nyngkong ha la ïing. “Ngi khmih lynti ba ki rangïalehkai kin ïaleh-kai bha ha kane ka jingïa-khun. Wat la ka dei ka jingïakhun kaba nyng-kong eh ha la ïing, hynrei kum ka kynhun ngin ym ailad ïa ka liang pyrshah namar ka jingangnud ka jong ngi ka long ban khur ïa ki lai point.”
Nalor ki rangïalehkai kiba napoh ka Jylla bad kumjuh na ka thaiñ shatei lammihngi, ka Lajong ka don ruh ïa ki saw ngut ki rangïalehkai nabar ri kata u rangïalehkai ‘dien na Brazil u Daniel Goncal-ves, kumjuh u rangïalehkai shakhmat na Senegal u Abdou Karim Samb, u rangïalehkai shapdeng na Brazil u Renan Paulino de Souza bad uwei pat u rangïalehkai shakhmat na Japan u Takuto Miki.
“Ha ka jingïalehkai pyrshah ïa ka Mohamme-dan ngi la pyrshang ban ïalehkai bha, hynrei ngim shym la lah ban thep kol. Te kumta ha kane ka jingïalehkai ha la ïing ngin pyrshang ban ïalehkai bha na ka bynta ban khur ïa ka jingjop namar ngi donkam eh ban khur ïa ki lai point ha la ïing hashwa ban gin jam sha kiwei pat ki jingïakhun jong kane ka lympung.”
Ha kawei pat ka liang u coach ka NEROCA u Jocob M.J Joseph u la pynpaw ba ka jingdiaw mynsiem halor ka jingbym lah ban ïalehkai bha ka kynhun ha kine ki ar tylli ki jingïakhun ba la lah, hynrei ha kane ka jingïa-khun u la khmih lynti ba kin ïalehkai bha na ka bynta ban khur ïa ka jingjop.
“Ka kynhun kam shym la lah ban ïalehkai bha ha ki jingïakhun ba la lah na ka daw ka jingtlot ha ka bynta kaba shadien. Te kumta ha kane ka jingïa-khun pyrshah ïa ka Lajong ngi la pynkhlaiñ ha ka bynta kaba shadien da kaba wanrah ïa lai ngut ki rangïalehkai ‘dien,” u la bynrap.
U Joseph u la ïathuh ba ka NEROCA kaba la mad ïa ki jingeh halor ki ki jingjia hapoh ka jylla Manipur ha kaba kam shym la ïoh ban pynkhreh bha bad ka la ïoh ban soi ïa lai ngut ki ki rangïa-lehkai hashwa ban sdang kane ka lympung. “Ngim don ïa ki khlur thep kol kumba long kiwei ki kynhun, hynrei ngin ïalehkai kum ka kynhun hi baroh kawei bad ngi khmih lynti ban khur ïa ka jingjop.”
