Bertina Lyngdoh
Ka don ka jingong kaba ong, ba wat babe ïa kaba lah dep, wat pyrkhat ne khmih lynti ia ka ban sa wan, hynrei im bad kmen ïa ka mynta. Dei te kaba dei shisha, hynrei katno ngut na ngi, ngi lah ban im kumba kane ka jingong ka ong. Ban im bad pyrkhat sah ïa kaba lah dep, kam myntoi shisha bad ban pyrkhat lypa ïa ka ban sa wan ruh tip kan urlong mo. U briew hi um lah ban tip lypa ïa ka ban sa wan, hynrei kine baroh ka shong ha ka mon u kynrad. Kum ki briew, ngi bun ki jingpan jingdawa na u Blei, hynrei ngim tip pat ba u Blei u ibit ne m ban ai ha ngi ïa kat kaba ngi dawa. Ka jingai u Blei barabor kam long kat kum ba ngi pan ne kwah. U don la ki jong ki plan kiba shuwa ba ngin pan u lah dep mang lypa.
Kumta, phi i mynsiem ba la saiñdur u Blei wat lada ngi sngew ba ka dei ka jingbakla ha ka jinglong doh ba tlot jong ngi na kawei pat ka liang ka dei ruh ka mon u Kynrad. Lada khlem ka mon u Kynrad kaei kaei ka jingjia ruh kan nym pynpyrkhat ïa ngi. Ki don ki hukum u Kynrad ïa kiba kum ki briew ngi dei ban bud, hynrei ba briew te ba naduh dang ha kpoh ka kmie la pun lypa da ka pop ka sang ka kmie u kpa kumta ka pyni ba ngi la ïaidlait na ki katto katne ki hukum u Blei. Nalor kane, kum ki briew, ngi don ruh bun sa da kiwei pat ki jingbakla kata ym tang ia u para briew hynrei wat ïa u nongbuh nongthaw. Kine ki kynthup ïa ki jingleh sniew jong ngi, jingtharai sniew, ka peit sniew, ka mushlia ïa ka kam kiwei bad kiwei kiwei. Ban pynsngap ïa kita baroh ha ka pyrthei, ngi shu sngewpoh ïalade hi. Kane ka dei ka pyrthei ïing shong basa ha kaba ngim tip shi minit nangne kaei ka ban jia ïa ngi. Mynta ngi kynduh ïa ki briew ba bha, lashai ynda kawei pat ka sngi ngi ïashem ïa kiba pynmong ïa ngi. Shiphang mynshuwa ngi ioh ki jingkyrkhu, sa shiphang shibit pat ngi shah bynthiew ne shah pynrem. Baroh kine ki dei tang ki jingtynjuh lehse namar ba ngi la ïaid bakla ha ka jingim jong ngi. Kumta, ban sngewbha ha la ka mynsiem, ai ba kaba lah dep kan leit noh namar ngim lah shuh hi ban leit phai ne leh eiei ïa ka hynrei sa tang ban pdiang beit ïa kaba la jia bad ba ngin long khlaiñ ha ka mynsiem ïa ka ban sa wan ha ka jing-khmih jingpynïaid u Kynrad da kaba ngi ngeit bad shaniah skhem ha u. Para briew ngi sngew ba ngim lah shuh ban ïa mab, khamtam haba ïa dei bad ki kam poh kam sang hynrei to tip ba u blei u long uba ïai mab bad uba weng noh ïa ka jingmong ka mynsiem.
Namarkane, wat bynniaw la ki jingbakla hynrei pyndep hok la ki kamram ba dang sah shadien. Thmu bha ïa kaba sha khmat, ryngkat ka jingbuh ïaki ha ki kti u kynrad. Dei tang u nongthaw hi uba lah ban mab, ban isynnei, bad sngap ïaki jingkyrpad jong ngi. Wat sngew eiei la ngi hap ban kit bad bah la ki pop, wat lada kin long da ki snem ne da ki bnai, hynrei to tip ba ki jingkyrkhu ba ngi ioh na u Blei ki long ki jingkyrkhu bymjukut. ïai im ban mab, bad ban isynnei kumba ngi la shah mab bad ïai isynnei na u kpa bneng jong ngi.
