Kyiv, Naiwieng:
U President ka Ukraine- u Volodymyr Zelensky ha kane ka por, u la ong ba kane kam long ka por ïa ka Ukraine ban pyrkhat halor ka jingpynlong ïa ka ilekshon. Kane ka long hadien ka jingïakren bad jingïatai jong ki heh nongïalam ka Ukraine ba ka lah ban don ka jingpynkylla bad jingjied President thymmai da kumno-kumno ha u snem 2024.
Kumta, u Zelensky ha kane ka kynti, u la ong ba ka mat ba kongsan ban ïa pyrkhat ka long kumno ban ïada ïa ka ri na ki jingma jong ka thma ka Russia bad ïa ka ilekshon lei yn sa pynlong hadien bad yn sa jied nongïalam thymmai hadien lada ka dei ban leh kumta ruh.
Namar ha kum kane ka por, u Zelensky u la ong ba ka long ka por ïa baroh ki paidbah bad ki nongïalam jong ka ri ba kin ïatylli kawei bad kam dei ïa ki ban pyrkhat ïa ka jingsynshar ne ban ïaknieh bor namar ka Ukraine wat haduh kine ki sngi, ka dang ap jingma na ka jinghiar thma jong ka Russia.
Shuh shuh la ong ba ka jingthep vote ruh kan shem jingeh ha kum kane ka por ba bun na ki nong Ukraine ki dang don shabar bad ki shipai ruh ki dang mih shakhmat ban ïakhun pyrshah ïa ki shipai ka Russia.
Namar kumba la ïohi ba wat ia ka jingjied nongmit khmat sha ka ïing dorbar thaw aiñ kaba dei ban long ha une u bnai ba la lah ruh, la pynsangeh noh shwa namar jong ka jingdon ka thma.
U Zelensky u la shah jied kum u President ha u snem 2019, bad ha u Nailur jong une u snem, u la ong ba na ka liang jong u, u long ba la pynkhreh ban pynlong ïa ki ilekshon hynrei ka long kaba donkam ruh ban phah khmih bniah da kiba na bar khnang ba ka jingïakhun ilekshon kan long kaba khuid bad ba sngur.
