Jowai, Naiwieng 08
Ka Shangpung Lumiawmushai ka la khur jingjop ha ka lympung ïalehkai Super Division Football Tournament na ka bynta u Kiang Nangbah Memorial Trophy 2023 ba la pynïaid da ka West Jaiñtia District Sports Association (WJDSA).
Kane ka nam jop ka la wan urlong hadien ba ka la lah ban pynliem noh ïa ka Mynthong da 3-1 kol ha ka sngi Balang ha Kiang Nangbah Stadium kaba ha Ladthadlaboh, Jowai bad u Eliser Suiam u la ïoh ban thep ar kol.
Ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang. Ka Shangpung Lumiawmushai ka la ïoh ban thep kol eh lyngba u Bantei Ïakai ha ka minit kaba 19. Kane ka shi kol ka la nangpynïoh mynsiem ïa kane ka kynhun ban ïakhun tyngeh shuh shuh, hynrei hadien shiteng kynta ka Mynthong ka la lah ban pynphai kylla lyngba u Riyanki Shylla ha ka minit kaba 34.
Hadien ba la bteng ïa ka jingiakhun jong ka kylla miet ka Shangpung ka la ïoh ban thep biang sa ar kol lyngba u Eliser Suiam ha ka minit kaba 88 & 90 na ka bynta ban khur syndon ïa ka jingjop.
Kande ka lympung kan bteng biang ha ka sngi Palei ha kaba ka Ladthadlaboh kan ïakhun pyrshah ïa ka Khimusniang ha ka por 2 baje nohphai sngi.
