Shillong, Naiwieng 08
U Anderson Talisca u la lah ban pynpaw ïa ka jingtbit na ka bynta ka Al Nassr hadien ka jingbym ïa don lang u Cristiano Ronaldo ha ka Asian Champions League ha ka sngi Ba-ar.
Une u rangïalehkai shakhmat na Brazil u la khur ïa ka hat-trick na ka bynta ban pynlong ïa la ka kynhun ban khur ïa ka jingjop da 3-2 kol pyrshah ïa ka Al Duhail ha Qatar.
U Ronaldo, uba la ïoh ban thep ar kol ha ki ar taïew ba la lah ha Riyadh ha kaba katei ka kynhun jong ka Saudi Arabia ka la jop da 4-3 kol ha la ïing pyrshah ïa kajuh ka kynhun, u la ïoh ban shongthait shwa shipor hadien ba u la ïoh ban ïakren bad u manager ka Nassr u Luis Castro.
Tang mar ïasdang ka jingïalehkai kaba la long ha Khalifa International Stadium, katei ka kynhun ïalehkai jong ka Saudi Pro League (Duhail) ka la ïoh ban pynkhih jar nyngkong eh lyngba u Philippe Coutinho hadien ba une u rangïalehkai barim ka Liverpool bad Barcelona u la ïoh ïa ka bol ba la ïarap pynbuh da u Michael Olunga, bad kane ka long ka kol kaba nyngkong eh jong u ha ka Asian Champions League.
Hadien katto katne por ka Nassr ka la lah ban pynphai kylla lyngba u Talisca ha ka minit kaba 27. Kane ka la wan hadien ka jingïarap pynbuh da u Abdulrahman Ghareeb hapoh ‘box’.
Hadien shiteng kynta u Talisca u la pynbud biang ïa ka kol kaba ar hadien ka jingïarap lang u Sadio Mane ha ka minit kaba 37 ha kaba u rangapkol ka liang pyrshah, u Salah Zakaria um shym la lah ban pyllait na ka jingshah thep.
U Taslica u la khur syndon ïa ka hat-trick hadien ba u la ïoh ban thep biang ïa ka kol kaba lai ha ka minit kaba 65. Kane ka long ka kol kaba hynriew ba u Talisca u la ïoh ban thep ha ki lai sien ïakhun jong ka Champions League.
Watla ka Duhail ka la shah thep, hynrei kam shym la duh mynsiem ha kaba ka la ïakhun tyngeh bad shwa ban kut ka jingïalehkai ka la pynphai kylla lyngba ka penalty ba la shut da Coutinho ha ka minit kaba 80. Kane ka la wan hadien ba u rangïalehkai ‘dien ka Nassr u Marcelo Brozovic u la kum pyndei da ka kti ïa ka bol hapoh ‘box’.
Hashwa ban wai artad ka Duhail ka la ïoh ban thep biang sa shi kol lyngba u rangïalehkai shongben u Khaled Mohammed ha ka minit kaba 90+2 hashwa ba kan mad ïa ka jingshah rem.
Haba phai sha kawei pat ka jingïakhun jong ka Group-E, ka Persepolis ka la ïasam mar shi point ha ka jingïakhun pyrshah ïa ka Istiklol hadien ba ki la ïakhaid mad 1-1 kol.
Te kumta ka Nassr ka dangbat ïa ka kyrdan ba hakhlieh jong kane ka group ha kaba ka la kamai 12 point na ki saw sien ïakhun. Katba ka Persepolis ka wan ba-ar ha kaba ka la kamai 7 point, ha kaba la bud da ka Istiklol (2 point) bad ka Al Duhail (1 point).
