Israel, Naiwieng:
U Myntri Rangbahduh ka Israel- u Benjamin Netanyahu ha ki khyndiat sngi ba la leit, u la kular ba ka Israel kan shim jingkit khlieh halor ka suk-ka shngaiñ jong ki paid nongshong shnong ka Gaza hadien ba la kut ka thma. Kane ka khubor ka long hadien ba ka tnat ka koit- ka khiah jong ka sorkar Hamas kaba synshar hapoh Gaza, ka la pynbna ba ka jingdon kiba khlad ha Gaza na ka thma Israel ka la kot ia ka 10,000 ngut namar ka jingleit hiar thma ba khlem sangeh jong ka Israel.
Namar kumba la ïohi ba dei ki lehnoh Hamas hi kiba la sdang ïa ka thma da kaba ther bom kput sha Israel ha ka 7 tarik u Risaw, ha kaba ki la leit ban thombor bad pynïap dusmon ïa ki paidbah nongshong shnong ka Israel haduh ha ïing- ha ïing bad nalor kata, ki la rahbor ruh ïa kumba 240 eiei ngut ki paidbah na Israel, kynthup ïa katto katne ngut kiba dei ki nongwei bad ki bym dei ki trai nongshong shnong ka Israel.
Namar kane ka daw, la ong ba ka Israel kam treh shuh ban ïasuk ne ban sangeh noh ia katei ka thma, hadien ba palat 1,400 ngut ki paid nongshong shnong ka Israel ki la duh ei la ka jingim ha katei ka jingleit thombor jong ki lehnoh Hamas ha u bnai ba la lah.
Kumta, ha kine ki khyndiat sngi ba la leit, hadien ba ka thma jong ka Israel bad ki Hamas ka la neh mynta la shi bnai kynthih, ka tnat ka koit ka khiah jong ka sorkar Hamas hapoh Gaza, ka la pyntip ba ka jingkhlad ki paidbah nongshong shnong ka Gaza na ka jingleit hiar thma jong ka Israel, ka la kot ïa ka 10,000 ngut bad kumba 4,000 tam napdeng kitei kiba khlad, ki dei ki khyllung- khynnah.
