Nongstoiñ, Naiweing 08
Ka lympung ïalehkai 3rd Division na ka bynta ka NDSA League Football Tournament 2023-24 ba la pynïaid da ka Nongstoiñ District Sports Association (NDSA) ka la jam sha ka semi final ha ka sngi Balang.
Ha ka jingïalehkai semi final kaba la long ha sngi Balang ha madan NDSA, Nongpyndeng, ka Tiehsyniangoiñ FC bad ka Dommawlien FC ki la jam sha ka final.
Ka Tiehsyniangoiñ FC ka la pynliem noh ïa ka Wahdibah FC da 3-1 kol bad ka Dommawlien FC ka la jop da 1-0 kol ïa ka Mawthaw YSCC.
Na ka liang ka tournament committee ka NDSA kal a pyntip ba ka jingïalehkai final jong ki ar tylli ki kyrdan ïalehkai jong ka 2nd bad 3rd Division kan long ha ka 14 tarik mynta u bnai ha kaba ïa ki jingïalehkai yn sdang naduh ka por 11 baje mynstep.
Shuh shuh ka la pyntip ruh ba ïa ka lympung ïalehkai jong ka super Division yn plie pyrda noh ha ka 15 tarik mynta u bnai ha ka por 1:10 mynsngi ha kaba ka kynhun ïalehkai jong ka Pyndengrei SCSC kan ïakhun pyrshah ïa ka Mawlarshong SC.
La pyntip ruh ba ka lympung ïalehkai 1st Division pat kan sdang ha ka 17 tarik mynta u bnai ha ka por 12:05 mynsngi ha kaba ka kynhun ïalehkai jong ka Porshangbet SCC kan ïakhun pyrshah ïa ka Lawse SC ‘A’.
