Nongpoh, Naiwieng 08
Ban nang pyntyllun bad pynïaid beit ïa ki kam ki jam ha ka ban kyntiew ïa ka jingïalehkai rah nar, ka Meghalaya Weightlifting Association (MWA) ha ka sngi Ba-ar ka la pynthymmai ïa ki nongkitkam ba pura ha ka jingïalang kaba la long ha ka nongbah Shillong.
Ki nongïalam ba hakhmat jong kane ka MWA kiba la shah bynshet ban ïalam ki kynthup ïa u Bah Donald Rymbai kum u President, u Bah Flanagan Kharwanlang kum u Vice President, u Batskhem Bassaiawmoit kum u General Secretary lem bad kiwei.
Haba kren sha ki lad pathai khubor mynta ka sngi ha Nongpoh, u Bah Donald kum u nongïalam ba thymmai ka MWA, nyngkong u la ai khublei ïa ki nongïalam barim jong ka seng bad kumjuh ruh ïa ki nongkitkam kiba thymmai ha kane ka kynti ba kin ai ïa ka jingïatreilang ban kyntiew ïa ka seng bad khamtam eh ïa ki samla ïalehkai ka Jylla kiba don sap ha kane ka jingïalehkai kaba dang thymmai hapoh ka Jylla.
U la ong ruh ba kum u nongïalam ba thymmai, ka thong hi ka long ban kyntiew ïa ki samla ka Jylla bad ha ki por ki ban sa wan, na ka liang ka seng kan sa leit ban pynsngewthuh bad hikai ïa ki samla sha kylleng ki district ka Jylla halor kane ka jait jingïalehkai bad kyrpad ruh ïa ka sorkar jylla ba kan kner bad ai ïa ki lad jingïarap sha ka seng ba kan ïaid shaphrang ban kyntiew ïa ki samla ha kane ka jingïalehkai.
Ha kajuh ka por, na ka liang u Bah Rymbai u la pynpaw ruh ïa ka jingsngewnguh ia ka Meghalaya State Olympic Association (MSOA) kaba la ïarap bad shim khia ban pynrung ïa ki samla ïalehkai ka Jylla ha ka North East Games 2022 ha kaba u la ïathuh ba watla ka dei ka sien kaba nyngkong eh, hynrei lai ngut ki nongïakhun na ka Jylla ki la ïoh ban khur ïa ki takma rnong.
