Shillong, Naiwieng 09
Ha ka sien kaba nyngkong ka Meghalaya Lawn Bowling Association of Meghalaya ka la ïoh pynrung ïa u samla Khrawbok Tongper na East Khasi Hills Dist kum u Technical Official ha ka Bowling Federation of India ha ka 37th National Games 2023 kaba la poi sha kaba kut ha ka sngi Palei ha Goa.
U Khrawbok u la ïoh rung teng kum u nongïa-lehkai ha ryngkat kiwei pat na ka jylla Meghalaya ban ïashim bynta ha ka 8th National Lawn Bowls Championship 2023 kaba la long naduh 21 haduh 30 tarik u Nailur mynta u snem ha Guwahati.
Kum shi bynta ban nang pynpaw ïa kane ka jingïalehkai lawn bowling hapoh Jylla, ka kynhun Meghalaya Lawn Bowling Association (MLBA) ka la ïoh ban phah ïa u Khrawbok kum u Technical Official ha ka Lawn Bowling ha katei ka lympung kaba la long ha Goa.
Da kane ka jingïohlad jong une u samla, la khmih lynti ba kane ka jingïalehkai kan ïoh lad ban nang paw hapoh ka jylla.
Na ka liang ka Meghalaya Lawn Bowling Association ka ai khublei kyrpang ïa u General Secretary bad President ka Meghalaya State Olympic Association (MSOA) ïa ka jingai mynsiem ka jingïarap jingïakren ban ïoh phah ïa utei u samla na ka jylla kum u Technical Official.
Katei ka synjuk ka la khmih lynti ba nangne shakhmat ka tnad ïalehkai jong ka Sorkar Jylla kin ai mynsiem bad kan kyrshan lem ïa ka MLBA ba kan ïoh ban pynlong ïa ki lympung ïalehkai bapher bapher hapoh Jylla khamtam ba kane ka jingïalehkai ka long kawei na ki jingïalehkai kaba ka Jylla kan hap pynkhreh na ka bynta ka 39 National Games hapoh jylla Meghalaya ha u snem 2025 lane 2026.
Ïa kane ka kyrwoh la pyllait da ka Kong V.N Lamare, President ka MLBA bad Kong R. Swett, General Secretary.
