Ha kine ki sngi, ki bor pulit ki ai jingtip halor ka jingdon jong ki briew kiba shu lute naphang khlem jingmap haduh ba poi u pud ba ki rahbor wat ïa ki nongñiah trok. Na ka liang ki pulit ki la lap ïa lai ngut kita kiba donkti ban lute na ki nongñiah trok khnang ban ïoh lute na ki. Ka jingkem ïa kine ki lai ngut na lynti Mawlai Bypass da ka jingïarap ki dkhot ka Meghalaya Traders Fresh Vegetable & Ginger Association and Khasi Jaiñtia Fresh Vegetable Suppliers Association ka pyni ïa ka jingthrang spah jong ki katto katne da kaba kjit ïa ka umsyep jong kiwei. Kum ïa kine ki nongkjit spah dei ban kem bad ban pynsaja ha ka rukom kaba dei. Ka long ruh kaei-kaei kaba ishyrkhei ba ki don ki bym salia shuh ban leh ïa kano-kano ka kam bymman tang ban bit ban biang ïalade. La ong ba kine ki lai ngut ki la donkti la bunsien ban rahbor bad dawa pisa na ki trai jong ki nongñiah trok bad ka jingthwet sa ïa kiwei pat kiba don lang ha kajuh ka ktem ka dang ïaid. Ngi ngeit ba ki don ruh sa kiwei pat kiba don bynta lang ha kum kine ki jait kam bad ma ki ruh ki dei ban ngat ha ka jingshah pynsaja kaba tyngeh.
Ngi lyngngoh ba kam don satia ka raiñ ka rem ha ki katto katne ban shu lute na katba don wat lada ki sngewthuh shai ba shisien ka sngi, kin sa ngat ha ka jingshah kem. Na kine ki jingjia lute, ka pyni ba ki trok ki dei ki sohpdung kiba jem bha jong ki nonglute bad ba ki surokbah ki dei kita ki surok jong ki nonglute ki bym salia ïano-ïano. Ka long shisha kaba ishyrkhei bad kaba pynpaw ïa ka jinghiar ha ka liang ka jingtreikam jong ka aiñ namar ki don ki bym tieng ïa ka aiñ katba kiba burom ïa ka aiñ ki ngat ha ka jingshah pynsaja kum ka jingkiew dor ki marbam mardih bad kiwei pat ki mar ki mata bakongsan. Hynrei kiba bun pat ki shu sngap la ka sngap watla ki mad jingeh. Ki nonglute kim da ïapher than na ki nongpynïap briew. Ki kjit suki-pa-suki ïa ka syep ka syar jong kiwei ban ïoh im pahuh pahai ïalade katba kito kiba la shah lute, ki hap bad mad ïa ki jingeh. Naei uta uba shah lute un pynmih ïa ka pisa kaba u la hap ban siew noh sha kita ki nongdawa? Ka lah ban shimpor da ki sngi bad ki snem ban khyllie biang ïa kaba la duh.
Ha kawei pat ka liang, ngi ïohi ba ka don ka jingkyrmen namar kum kitei ki seng jong ki nongdie jhur ki la wan shakhmat ban phah thwet ïa kito kiba donkti ban lute. Lada baroh-baroh ki ïa nud ban leh kumne, kan ym shimpor ban rat dyngkhong ïa ki nonglute baroh bad kan don biang ka jingkhuid jingsuba ha ka ïadie ïathied bad ki nongdie kin ym donkam ban oh dor heh ïa ki mar ki mata ka ban ïarap kylla ïa ki nongshong shnong khamtam ïa ki baduk. Kiwei ruh ki seng ne ki ‘riew shimet ki dei ban wan shakhmat ban pyntip ïa ki pulit lada ki ngat ha ka jingshah lute ha kino-kino ki kynhun lane ki runar. Lada don kum kita bad lada ki pulit ki trei hok ïa ka kam, kan ym shimpor ban pynkhuid ïa ka jyrsieh jong ka jinglute. Ka jylla jong ngi ka dei ka barit, shano hi kita ki nonglute ki lah ban phet jngai? Ha kane ka juk stad mynta, wat lada ki don sha jngai ruh, yn lah beit ban ïoh kem ïa ki wat lada kan kham shimpor.
Na ka liang ka sorkar ka dei ban hukum ïa ki pulit ba kin pahara bha ha shilynter ki surokbah ba don ha kane ka jylla khnang ban ïoh kem lang sa ïa kiwei pat ki nonglute. Hynrei ka sorkar ruh ka dei ban pynthikna ba kita ki pulit kin ym kylla nonglute pat ïalade namar ki la ju don ki jingjia ba ki pulit ha surokbah ki ju shim pisa na ki trok. Lada lap biang ïa kiba kum kita ki pulit, dei ban kem bad pynduh kam pynduh jam syndon ïa ki khnang ba kan long kum ka jingsneng ïa kiwei pat kiba don ïa kajuh ka jingthmu ban lute ïa ka umsyep jong kiwei. Ki pulit ki dei ban long ki nuksa ba bha ïa ki nongshong shnong. Lada ki ïalam da ki nuksa ki basniew, khlem pep kiwei ruh kin shlan ban ïa ïeng ha surokbah bad ban lute naphang khlem jingsalia. Ka dei ban don ka jingïatreilang kaba jan hapdeng ki pulit bad ki nongshong shnong ban rat dyngkhong ïa ki kam be-aiñ kiba bam kruiñ ïa ka imlang-sahlang.
Ngi kyrmen ba nangne shakhmat, kham bun shuh ki nonglute, la ki dei ki barit ne ki ba heh, kin shah kem naphang khlem jingsalia khnang ban ïoh pynkhuid noh ïa ka jyrsieh kaba la lang da ki phew snem mynta. Kiwei pat kiba dang don ïa ka jingthmu ban lute, sngewbha ban da ïa pyrkhat bha namar ka jingkamai suk khlem da pynjaw ïa ka snam bad ka syep ka syar, kan ym shongneh bad kan wanrah ïa ka jingkyrtoh kylla hadien habud. Trei shitom da ka lynti kaba dei bad wat lada ka jingïoh kam long kaba heh ruh, hynrei ka jingsuk ha ka mynsiem bad ka jingïatiplem kan ïaineh baroh shirta.
