Gaza City, Naiwieng:
Ka International Committee jong ka Red Cross ha ka Sngi Balang ka la iathuh ba uwei u nongleit pynpoi ia ki jingiarap sha Gaza, u la khlad noh hapdeng ka jingther bom jong ki shipai ka Israel bad ki lehnoh Hamas hapoh Gaza ha ka Sngi Ba-ar.
La ong ba 5 tylli ki trok kit marbam bad 2 tylli ki kali jong ka Red Cross kiba leit kit ia ki tiar jingdonkam bad ki dawai-dashin, ki la ngat ha ka jingiakhun thma jong ka Israel bad ki lehnoh Hamas ha katei ka sngi bad 2 tylli ki trok ki la julor bad ki nongñiah jong kitei ki trok ruh ki la ngat bad mynsaw lang ha katei ka jingjia.
Katba na ka liang ka ICRC kam shym la pyntikna ne tip shai ruh ba dei mano kitei kiba siat sha katei ka jaka ba iaid kitei ki trok kit jingiarap ha katei ka sngi. Bad ym shym la lah ruh ba iohi na kano ka liang kitei ki bom bad ki kuli ki wan poi.
Kumta, ka ICRC ka la ong ba lada ia ki nongleit sam jingïarap ruh kam don jingshngaiñ, shaei shuh ka jingshngaiñ ia ki paidbah nongshong shnong lei kan don.
Namar la ong ba katei ka tnat ka dang leit pynpoi shitom ia kitei ki marbam bad ki jingiarap naka bynta ki riew paidbah kiba la shah ktah jur ha katei ka jingleit hiar thma ka Israel sha Gaza.
Watla katta, la ong ba kitei ki kali kiba kit ia ki tiar sumar bad ki dawai- dashin ki la lah ban pynpoi da ka said ia kitei ki tiar ba la kit sha ka Al-Shifa Hospital.
Hadien kata, kitei ki kali jong ka ICRC ki la leit ban synran ia 6 tylli ki kali kit nongpang ba la kit ia ki paidbah ba la mynsaw jur bha bad ki ban leit sha Rafah naka bynta ban leit rung pat sha Egypt.
