Jowai, Naiwieng 09
Ka Jaiñtia Hills Autonomous District Council (JHADC) ha ka Sngi Palei ka la shong ïa ka Dorbar Tlang kaba tang shisngi bad kaba la neh tang kumba 90 minit eiei. Kane ka dorbar ka dei ruh ka sien shong kaba khatduh jong ka samoi ki MDC kiba mynta.
Ïa kane ka Dorbar Tlang la pynïaid da u Chairman jong ka JHADC u Dr Sankey Shangpung ha ka jingdonlang jong 28 ngut kiwei pat ki MDC.
Haba ïashim bynta ha ka kynta jong ka jingkylli bad jubab, u MDC ka Jowai Central u Bah Andrew Shullai u la kylli halor ka nongrim jong ka council ha kaba ïadei bad ki jaka ïakajia khappud bad ka Assam.
U Executive Member u Bah Fineliness Bareh u la jubab ba ka shnong Khanduli kaba hap hapoh ka Elaka Nongjngi, ka Lapangap, Mukroh kiba hap ha ka Elaka Shilliang Myntang, ka Mowluber bad Khatkhasla kumjuh ka Psiar kiba hap hapoh ka Elaka Raliang, kumba ka long mynta ki long hapoh u pud u sam ba pura jong ka JHADC bad Meghalaya, bad ka Assam ka ïai pyrshang na ka por sha ka por ban kyntur jaka sha kine ki shnong.
Haba ai jingpynshai shuh shuh halor ka jubab ba la ai da u Bah Bareh, u Chief Executive Member jong ka JHADC u Bah Thombor Shiwat u la ïathuh ba ka Sorkar Jylla ka la pan ïa ka jingsngew bad jingshem jong ka JHADC halor ki jaka ïakajia khappud bad ka Assam.
U la ïathuh ba ka Executive Committee ka la dep ai jubab sha ka Sorkar Jylla da kaba pynksan ba kitei ki shnong ba la kdew da u Bah Bareh ki dei ban neh ban sah shapoh Meghalaya bad kumjuh ruh ïa ki shnong Pnar hapoh Elaka Labang Nongphyllut ki dei ban wanphai noh sha Meghalaya.
U Bah Thombor u la pynshai ruh ba u pud u sam jong ka shnong Lapangap kam long kaba shai kdar haba pynshai halor ka jingjia kaba dang jia shen ha Lapangap. U la ong shuh shuh ba tang ka Mukroh ka dei ka shnong kaba don ïa ka ‘map’ bad ka jingkdew kaba shai ïa u pud u sam jong ka shnong.
U Bah Thombor u la ong ba kiwei ki shnong kiba don ha khappud kum ka Khanduli, Lapangap, Mowluber, Psiar bad Khatkasla kim don satia ka ‘map’ shnong kaba kdew ïa u pud u sam jong ka shnong.
Ha kawei pat ka liang, u MDC ka Jowai Central u Bah Awhai Andrew Shullai bad u MDC ka Jowai North u Bah Brightstar Chyrmang ki la kylli hato ka JHADC ki la ai jingithuh ne em ïa ka Elaka Labang Nongphyllut.
U Bah Thombor u la jubab ba ka Executive Committee ka la dep thung ïa u Acting Dolloi na bynta katei ka Elaka bad kane ka long kum ka jingithuh na ka JHADC.
Shuh shuh ha kane ka dorbar kaba shisngi, u Chief Executive Member ka JHADC Bah Thombor Shiwat u la wanrah ruh ïa ka kaiphod ha kaba ïadei bad ka jingpynbeit ïa ki katto katne ki bynta jong ka Jaiñtia Hills Autonomous District (Village and Town Development Council) Bills 2023.
Kane ka Village and Town Development Council ka dei kaba la mynjur da ka council ha ka dorbar kyrpang kaba long ha ka 20 tarik Jylliew 2023, hynrei na ka liang ka District Council Affairs (DCA) ka la pynphai biang ïa kane ka aiñ rew (bill) hadien ba ka State Law Department ka la lap ba donkam ban pynbeit ïa ki katto katne ki section bad ki kyntien shuwa ban phah sha u Lat ka Jylla ban ïoh ïa ka muhor jong u ban pynlong aiñ ïa ka.
Kane ka aiñ rew ka dei na ka bynta ban tehsong ïa ki shnong ki thaw bad kin don hapoh ka jingpeit ka council. Ka jingtreikam kane ka aiñ rew kan long beit thik na bynta ki kam pynroi ïa ki shnong ki thaw.
