Nashville, Naiwieng:
Ha u Lber jong une u snem, 3 ngut ki khynnah bad 3 ngut ki dkhot jong kawei ka skul hapoh Nashville jong ka United States ki la duh ei noh ia ka jingim ha ka jingsynreit kuli naphang jong uwei u khynnah pule barim jong katei ka skul hi.
Ia utei u nongsiat la ithuh kum u Audrey Hale, 28 snem ka rta bad u dei u nongshong shnong ka Nashville bad u long u khynnah pule jong katei hi ka skul bad la ju tip ia u kum u long kynthei-shynrang ‘Transgender’.
Mynta la don kumba 8 bnai ba katei ka jingjia ka la dep jia, uwei na ki heh ka tnat tohkit u la pyllait ia ki jingtip ba bniah shaphang jong utei u nongsiat bad la ong ba utei u runar u da don da ka thong bad ka jingthmu ban leit thombor ia katei ka skul bad ia ki jaitbynriew dohlieh baroh.
Katto- katne na ki jingthoh ba la lap na ka jaka ba u ju shong, ki long ‘Kill all you little crackers’, ‘I hope I have a high death count’ bad ‘I’m ready… I hope my victims aren’t’ bad kawei ka jingthoh kaba khatduh ka long ‘Ready to die’.
Ki don shibun kiwei- kiwei de ki jingthoh ba utei u runar u la thoh bad buh shun ia katei ka skul bad ia kiwei ruh ki jaitbynriew doh lieh bad ki pulit ki la sdang ban lap bniah ia ki jingthmu jong utei u runar naduh kaba sdang shuwa ba un leh ia katei ka kam thombor.
Watla katta, ki pulit ka Metro Nashville Police Department kim pat lah ban pyn tikna beit la kitei ki jingthoh ki dei kiba la thoh hi da ka kti jong u Hale hynrei ki la pyntip ba ki dang hap ban bud dien bad wad bniah shuh shuh. Namar ia kane ka bynta khmih bniah bad phah tohkit ruh da ka ïingbishar, kumba ka FBI ruh kam shym la leit ban tuklar ne ban ïadon kti lang haba iadei bad ka jingwad bniah bad katei ka kam.
La ong ruh ba ki don katto katne ki heh bad ki bahaiing jong kito kiba ngat ha katei ka jingjia, ki la kyntu ia ki bor pyniaid ban ym pynpaw paidbah ia kitei ki jingthoh namar ka lah ban ktah jur ia kito kiba la shah ktah ha katei ka jingjia bad ka lah ruh ban wanrah ia ka jingsniew hadien- habud.
Ha ka por ba u Hale u leit rung sha katei ka skul Covenant, u don ia 2 tylli ki suloi heh bad kawei ka suloi kti, bad la ong ba u la siat kumba katto- katne kuli shuwa ba un rung shapoh jong ka skul ruh. Ki pulit ki la iathuh ruh ba u Hale um pat ju don kino- kino ruh ki dak sniew ha katei ka skul lane bad katei ka skul. U Hale u la pyndep ia ka ‘Graduate’ na ka Nossi College of Art ha ka ‘Illustration & Graphic Design’ ha u snem 2022.
Hynrei la ong ba ki jingjia synreit kuli ha ki skul bad jaka pule ki long kiba kynrei hapoh United States, ha kaba ka la mih ruh ka jingpyrshah na ki paidbah namar ka jingpyllait lan jogn ki bor pyniaid ka United States ia ki paidbah ban thied ne buh tiar siat.
