Shillong, Naiwieng 09
Ka jingkheiñ sting ki rang -ïalehkai ka Shillong Lajong FC ka la pynlong ban shah pynphai kylla ha ka NEROCA na ka bynta ban ïakhaid mar 1-1 kol ha ka lympung ïalehkai I-League ha ka sngi Palei ha SSA Stadium, Polo.
Kane la wan lyngba u rangïalehkai shapdeng na Jamaica u Fabian Dwayne Reid na ka bynta ban pynlong ïa katei ka kynhun kaba na Manipur ban khur ïa ka shi point kaba nyngkong eh ha kane ka lympung.
Watla ka NEROCA ka la shah rem ha ar tylli ki jingïalehkai ba la dep, pynbna ha kane ka jingïakhun kaba la long ha kane ka nongbah ka la lah ban pyni ïa ka mynsiem ïakhun hakhmat ki san hajar shiteng ki paidbah nongkyrshan ka Lajong.
Ha ka jingshisha ki rangïalehkai ka Lajong ki la dei ban ïakhun tyngeh ha kum kane ka jingïakhun kaba nyngkong eh ha la ïing, hynrei ka la long pynban da khongpong bad kam shym la lah ban pynhun ïa ki paidbah nongkyrshan jong ka.
Hapdeng kane ka jingïakhun, ka Lajong ka la ïoh ban pynkhih jar hadien shiteng kynta lyng -ba u rangïalehkai shapdeng na Brazil u Renan Paulino de Souza, uba la ïoh ban pyndei da ka khlieh ha ka corner ha ka minit kaba 34.
Kane ka shi kol ka la pynïoh mynsiem shipor ïa ka Lajong ban ïai bteng ha ka ban ïakhun tyngeh ha kaba ka la ïoh ïa lai tylli ki kabu ksiar, hynrei kam shym la lah ban thep na ka daw ka jingïashan eh ki rangïalehkai ‘dien lem bad u rangapkol.
Hadien katto katne por ba la bteng ïa ka jingïakhun jong ka kylla miet ki rangïalehkai ka NEROCO ki la sdang ban ïakhun tyngeh bad dei ha ka minit kaba 79 ba ka la ïoh ban pynphai kylla lyngba u Dwayne Reid na ka bynta ban ïakhaid mar shi kol.
Kane ka jingshah pynïakhaid ka la pynkyndit bynriew ïa ki rangïa-lehkai ka Lajong ban ïakhun tyngeh, hynrei haduh kaba kut kam shym la lah ban pynphai bad ha kaba kut ki la ïasam mar shi point.
Ka Lajong kan pynkhreh biang ïa ka jingïakhun ha la ïing pyrshah ia ka Sreenidi Deccan ha ka 14 tarik mynta u bnai.
