Jowai, Naiwieng 09
Ka Ladthadlaboh ka la pynliem noh ïa ka Khimusniang da 4-2 kol na ka bynta ban khur jingjop ha ka Super Division Football Tournament (U Kiang Nangbah Memorial Trophy 2023) ba la pynïaid da ka West Jaiñtia District Sports Association (WJDSA) ha ka sngi Palei.
Ha kane ka jingïakhun kaba la long ha Kiang Nangbah Stadium Ladthadlaboh, Jowai, ka Ladthadlaboh ka la ïoh ban thep kol tang hapoh ka 7 minit ba dangiaid ka jingïalehkai ba la thep da u Banteilang Shylla bad ka la pynbud biang ïa ka kol kaba ar lyngba u Daunisakiai Dkhar ha ka minit kaba 44. Hashwa ban kut ka jingïakhun jong ka kylla step ka Khimusniang ka la lah ban pynpha kylla shi kol lyngba u Precious Tang ha ka minit kaba 45+1
Hadien katto katne ba la bteng ïa ka jingïakhun jong ka kylla miet, ka Ladthadlaboh ka la thep biang sa ar kol lyngba u Sanbor Kharshanoh ha ka minit kaba 88 bad u Promi Suting ha ka minit kaba 90. Hynrei shwa ban wai artad ka Khimusniang ka la ïoh ban thep biang sa shi kol lyngba u Heisniawki Syngkon ha ka minit kaba 90+1 hashwa ban kan mad ïa ka jingshah rem ha kane ka jingïakhun.
Kane ka lympung kan bteng biang ha ka 13 tarik ha kaba ka Mukhla Raij SC kan ïakhun pyrshah ïa ka Mynthong SC ha ka por 2 baje janmiet.
