Shillong, Naiwieng 09
Ka St. Anthony’s College bad ka BBS College ki la jam sha ka final ha ka lympung ïalehkai NEHU Inter College Cricket (Men) Tournament 2023 bad kin ïaknieh ïa ka nam lahduh ha ka sngi Saitjaiñ ha phyllaw jong katei ka skulbah kaba ha kane ka nongbah.
Ha ka jingïakhun semi final kaba la long ha ka sngi Palei, ka Anthony’s College ka la pynliem noh ïa ka NEHU, Shillong da 53 run. Kham ha shwa hadien ba jop kynting pisa, ka St. Anthony’s College ka la shimti ban tied nyngkong bad kamai 168 run na bynta ban duh 3 wiket ha ki 20 over. Haba wan shimti ïa ka pali kaba ar, ka NEHU, Shillong kam shym la lah ban kynjoh sha ka thong ha kaba ka la kamai 115 run ha ki 19.3 over bad shah pynhap wiket baroh ki nongtied.
Haba phai sha kawei pat ka jingïakhun kaba ar, ka BBS College ka la jop da 7 wiket ïa ka NEIAH, Shillong. Ha kane ka jingïakhun ka NEIAH ka la shimti ban tied nyngkong ha kaba la kamai 117 run hadien ba ka la shah pynkhyllem baroh ki nongtied. Haba wan shimti ïa ka pali kaba ar, ka BBS College ka la kynjoh sha ka thong ha ki 8.1 over hadien ba ka la shah pynkhyllem 3 wiket.
Te kumta ka St. Anthony’s College bad ka BBS College kin ïaknieh ïa ka nam lahduh ha ka jingïakhun final ka ban long naduh ka por 8:30 mynstep.
