Nongstoiñ, Naiwieng 09
Ka kynhun ïalehkai phutbol na West Bengal, ka Kanchanjunga FC ka la wan poi ha ka sngi Palei ha sor Nongstoiñ na ka bynta ban pynkhreh ïa ka jingïakhun ha ka lympung ïalehkai Invitation Knockout Football Tournament 2023-24 ka ban pynlong da ka New Nongstoiñ Sports Social & Cultural Club.
Kane ka kynhun ka dei kaba la wan mih bujli ha ka jaka jong ka Jamshedpur FC ka bym shym la wan shuh namar ki kam kiba ka ïatyngkhuh.
Ka Kanchanjunga FC kan ïakhun pyrshah ïa ka Ri Bhoi United FC ha ka sngi Thohdieng ha madan New Nongstoiñ kaba long ruh ka sngi plie pyrda ïa katei ka lympung ïalehkai.
U kapten ka kynhun ka Kan-chanjunga FC, u Anish Rai haba kren bad ki lad pathai khubor hadien ka jingwan poi jong ka kynhun ha sor Nongstoiñ u la pynpaw da kaba ong, “Ngi la wan naduh ka jaka ba jngai bad ka jingangnud ka jong ngi ka long beit ban ïoh khur ïa ki jingjop ha ki jingïalehkai bad ngin pyrshang ruh ban ïalehkai bha katba lah.”
Shuh shuh u la ong ruh ba ka kynhun ïalehkai jong ki, ka dei kaba dang lung hynrei kan pyrshang ban sei ïa ki sap ïalehkai jong ki rangïalehkai kiba dangkhynnah. Kumta ka la pynlong ïa ki ban wan ïashim bynta ha kane ka lympung ka ban long ruh ka jingplie lad ïa ki rangïalehkai hapoh ka kynhun.
U Anish u la kyntu ruh ïa ki paidbah ka dong ka thaiñ ba kin wan ban ai jingkyrshan lang ïa ka kynhun ka jong ki, ha ka jingïalehkai ka ban long ha ka sngi Thohdieng ha madan New Nongstoiñ.
Lah ban kdew hangne ba ka khusnam baroh ha kane ka lympung ka la long T.12 lak tyngka bad ka bai rung na ka bynta ki nongwan peitkai kan long T.150 tyngka marwei.
